OEKUSI, 12 Abríl 2026 (TATOLI)—Atuál Prezidente Autoridade (PA) Rejiaun Administrativa Espesiál Oekusi Ambeno (RAEOA), Régio da Crus Salu, fó konfiansa ba PA Interinu, Celestinho Marques, atu garante funsionamentu administrasaun iha Oekusi hodi lidera prosesu tomak to’o estabelesimentu estrutura definitiva.
“Ha’u rasik, maski iha ha’u-nia auzénsia rekuperasaun saúde nian, maibé hasoru malu tiha ona ho Prezidente Autoridade RAEOA Interinu, atu fó nafatin ha’u-nia konfiansa no apoiu tomak atu lidera RAEOA nia prosesu importante,” referidu nota ne’ebé Ajénsia TATOLI asesu, Domingu ne’e.
Régio da Cruz dehan, atu reorganiza filafali RAEOA, tenke prepara didi’ak prosesu no kualidade estrutura definitivu ba administrasaun Governativa RAEOA nian.
Nia lembra katak, antes ne’e iha loron 26 Marsu 2026, prosesu ne’e hahú ona hamutuk ho Governu Sentrál, liliu hamutuk ho Komisaun Funsaun Públika (KFP) Ministériu Administrasaun Estatál (MAE) no Ministériu Finansa (MF) dezde loron 07 Setembru 2025.
“Prosesu tékniku ida-ne’e, sei kontinua ho KFP, MAE ho MF to’o estrutura foun definitivu RAEOA reorganizadu pose no kontinua hala’o knaar,” nia tenik.
Notísia relevante : PA interinu RAEOA garante sei halo jestaun di’ak ba ezekusaun OJE 2026
Tuir Régio da Cruz, Oekusi Ambeno tenki dezenvolve sai Rejiaun Administrasaun Espesiál ida-ne’ebé éfikaz, institusaun administrativamente dinamizadora iha planamentu no jestaun públiku nian, nune’e bele promove povu no potensiál ekonomia sira-ne’ebé iha, ba povu nia bem-estár no rezilénsia
“Nu’udar Prezidente Autoridade RAEOA, ha’u fó nafatin konfiansa no korajen ba maun-alin Atoni Oekusi Ambeno sira, liliu membru Autoridade RAEOA sira, funsionáriu públiku permanente sira iha RAEOA,” nia tenik.
Prezidente Autoridade RAEOA apela ba membru autoridade atu serbisu hamutuk ho Prezidente Autoridade Interinu garante atendimentu administrasaun iha Oekusi ho kualidade.
“Husu ba ha’u-nia membru autoridade sira atu fó apoiu tomak ba Prezidente Autoridade, RAEOA Interinu iha prosesu saida de’it iha períodu ida-ne’e. Faze ida-ne’e tenki remata ho kualidade, imparsiál no ho rezultadu ida-ne’ebé administrativamente sei hatuur ita-nia RAEOA iha potensialidade dezenvolvimentu lokál, ida-ne’ebé importante, promove nafatin povu nia ekonomia no unidade. Ita Oekusi Ambeno oan ne’ebé atualmente lidera hela RAEOA, sei rai hela legadu administrasaun ukun ida ne’ebé di’ak ba Atoni, no lidér sira seluk tuir mai,” nia hato’o.
Iha okaziaun ida-ne’e, Prezidente Autoridade RAEOA husu ba ekipa preparativu ba Planu Estratéjiku Dezenvolvimentu Rejional (PEDR) RAEOA faze daruak ba tinan 2027 to’o 2031 atu kontinua koordena ho Diretór Rejionál Planeamentu no Aprovizionamentu ho Koordenadór Zona Ekonomia Espesiál Dezenvolvimentu Oekusi Ambeno (ZEEDOA) atu remata faze inisiál no krusiál prosesu tékniku dezenvolvimentu PEDR RAEOA nian.
“Iha períodu ida-ne’e, kontinua ita-nia makisot (vizita malu), hamutuk ba Oekusi Ambeno nia bem-estár. Haree no promove Oekusi Ambeno, uma boot ba hotu, Nai Maromak, rai le’un ho ita hotu nafatin,” nia katak.
Jornalista : Abílio Elo Nini
Editora : Julia Chatarina
