KOVALIMA , 13 Abríl 2026 (TATOLI)– Autoridade Fatumea, Munisípiu Kovalima, organiza komunidade sira hodi kee no hasai sedimentasaun ne’ebé taka estrada iha Aldeia Fatumea, Suku Fatumea bá kapitál Kovalima.
Xefe Suku Fatumea, Postu Administrativu Fatumea, Sergio do Rego, dehan autoridade komunitária mobiliza komunidade hodi kee estrada ne’ebé mak kotu no hasai sedimentasaun ne’ebé mak taka estrada hodi fasilita movimentu transporte públiku no privadu.
“Ita ko’alia kona-ba kondisaun estrada postu administrativu dadaun-ne’e grave tebes tanba ne’e mak iha sesta semana kotuk, ha’u organiza komunidade-sira kee estrada hodi hasai sedimentasaun ne’ebé mak taka estrada nune’e fasilita movimentu transporte públiku no privadu”, Xefe Suku Fatumea, Postu Administrativu Fatumea, Sergio do Rego relata ba jornalista sira iha resintu edifisiu CNE Tabakolot, Kovalima, ohin.
Lidér Suku ne’e dehan, razau organiza nia komunidade atu fasilita sira bainhira sosa nesesidade báziku labele hulan de’it.
Relasiona kondisaun estrada hanesan xefe suku iha responsabilidade submete ona pedidu iha fulan Fevereiru ba servisu munisipal Obra Publiku Kovalima, maibé laiha rezultadu, entaun hanesan xefe suku buka meiu seluk hodi mobiliza komunidade kee rasik estrada ho metru 100 ne’ebé kotu no hasai redimentasaun ne’ebé taka estrada.
Iha fatin hanesan, Xefe Suku Nano, Abel Mendonça, reforsa katak Governu presiza fó prioridade atu hadia estrada ba komunidade iha Fatumea tanba atu fasilita movimentu transporte públiku no privadu.
“Ami hanesan xefe suku ejize Governu atu hadia estrada tanba haree ho kondisaun estrada ne’ebé aat entaun folin transporte públiku sa’e tanba daudaun-ne’e kada pesoál ema ida selu $7.00 antes kada pesoál ida selu de’it $5.00” nia dehan.
Ejizénsia líder ligasaun estrada husi Tilomar ba Fatumea ne’e relasiona haree kondisaun estrada ne’e grave, nune’e prejudika transporte no privadu hodi halo movimentu liuliu ba inan isin-rua sira atu partu husi postu transporta mai iha kapitál munisípiu defisil atu liu iha área Maubesi suku Beiseuk.
Postu Administrativu Fatumea iha nia suku sira mak hanesan, Suku Fatumea,Nanu no Suku Belulik, Belulik Leten ho nia aldeia 12 hanesan Baleo Quic,Clai halec,Mane Quic,Belulic Craic, Fatumea, Lebo, Rai oan, Mota Ulun, Nanu, Halic Nai,Traducama no Macocon ho nia luan área kilometru 132, distánsia husi postu administrativu ba kapitál munisípiu kilometru 54.
Jornalista: Celestina Teles
Editór: Florencio Miranda Ximenes
