DILI, 13 Abríl 2026 (TATOLI)—Embaixadór Kamboja iha Timor-Leste, Chun Sovannarith, segunda ne’e, iha Palásiu Prezidensiál Nicolau Lobato, Bairru-Pite Dili, hasorumalu ho Prezidente Repúblika José Ramos-Horta hodi ko’alia kona-ba kooperasaun bilaterál nasaun rua (2) nian liuliu kona-ba asina akordu izensaun vistu ba titulár.
“Ida-ne’e, ha’u-nia enkontru dauluk ho Prezidente Repúblika, iha enkontru ne’e ami diskute kona-ba asuntu kooperasaun bilaterál liuliu kona-ba asina akordu izensaun vistu ba titulár no pasaporte baibain ne’ebé asina ona entre Timor–Leste no Kamboja ba nia implementasaun no diskute mós kona-ba turizmu no konetividade,’’ Embaixadór Kamboja, Chun Sovannarith, hateten ba jornalista sira hafoin ramata enkontru ho Xefe Estadu.
Iha enkontru ne’e, Prezidente Repúblika mós rekomenda ba Embaixada Kamboja iha Timor – Leste, labele baruk atu loke komunikasaun jerál kona-ba kompromisu kooperasaun bilaterál no Ramos-Horta disponível atu ajuda kualkér difikuldade ne’ebé mak Embaixada Kamboja hasoru iha Dili.
“Prezidente husu ha’u labele baruk atu loke komunikasaun kompromisu jerál hodi kontinua hametin kooperasaun bilaterál entre Kamboja no Timor-Leste,’’ nia dehan.
To’o agora, Kamboja fornese ona ajuda ne’ebé foka ba Timor-Leste liuliu alvu ba apoiu saúde durante pandemia COVID-19 no apoiu polítiku ba integrasaun ASEAN.
Kontribuisaun signifikativu sira inklui fornesimentu médiku sira iha 2020 no advokasia kontinua, ho nivel aas ba Timor-Leste nia admisaun iha bloku rejionál ASEAN.
Jornalista : Hortêncio Sanchez
Editór : Cancio Ximenes
