DILI, 13 Abríl 2026 (TATOLI) – Folin petróleu sa’e maka’as liu $100 kada barríl iha segunda-feira 13 Abríl 2026, relasiona planu blokeiu hosi Mariña Estadu Unidu Amérika nian ba Estreitu Ormuz, ne’ebé bele restrinje karregamentu petróleu Iraun nian hafoin EUA no Iraun la konsege hetan akordu ida hodi hakotu funu.
Tuir REUTERS ne’ebé TATOLI asesu, petróleu brutu Brent nian sa’e $7.60, ka 7.98%, ba $102.80 kada barríl iha oras tuku 23:10 kalan oras lokál hafoin folin tun 0.75% iha sesta (10 Abril).
Entretantu, petróleu brutu Intermediáriu Texas Oeste EUA nian iha $104,88 kada barríl, sa’e $8,31, ka 8,61%, ne’ebé hafoin tuun 1,33% iha sesaun anteriór
“Merkadu agora barak liu mak hasa’e folin mina filafali ba kondisaun sira antes sesarfogu, exetu agora EUA planu sei blokeia fluxu restu to’o barril millaun 2 kada loron relasionadu ho Iraun liuhosi Estreitu Ormuz nian”,Xefe Investigasaun Enerjétika iha MST Marquee, Saul Kavonic hateten liuhusi nota impresa ne’ebé Tatoli asesu ohin.
Entretantu, Prezidente Norte-Amérikanu, Donald Trump, iha loron-domingu 12 Abríl katak Mariña norte-amerikanu planeia sei blokeia estreitu Ormuz, tanba negosiasaun sira ho Iraun la konsege hetan akordu ida hodi hakotu funu, hafoin sesarfogu ida ne’ebé frajil durante semana rua liuba.
Nia hatutan tan katak, folin gazoel no gazolina nian provavelmente sei aas nafatin to’o eleisaun intermédiu sira iha fulan-Novembru, rekoñesimentu ida ne’ebé ladún akontese hosi konsekuénsia polítika potensiál sira hosi nia desizaun hodi ataka Iraun semana neen liubá.
Komandu Sentrál EUA nian hateten katak, forsa sira EUA nian hahú planeia sei blokeiu ida ba tráfiku marítimu hothotu ne’ebé tama no sai hosi portu Iraun iha loron segundu tuku 10 dadeer oras lokál.
“Ida ne’e la’ós de’it limita esportasaun hosi produtór petróleu sira hosi Golfu Pérsiku, maibé sei limita mós kapasidade Iraun nian hodi esporta petróleu no sei agrava interupsaun sira fornesimentu nian ne’ebé maka merkadu hasoru daudaun”, Analista ANZ, Brian Martin ho Daniel Hynes, hateten.
Folin mina ne’ebé sa’e maka’as ne’e hamosu preokupasaun sira kona-ba presaun inflasionista globál sira no dezaselerasaun ekonómika potensiál ida, karik interupsaun sira fornesimentu nian kontinua.
Tensaun sira aumenta hafoin Guarda Revolusionáriu Iraun nian fó sai alerta maka’as ida katak kualkér ró militár ne’ebé hakbesik ba Estreitu Ormuz nian sei konsidera hanesan violasaun ida ba sesárfogu.
Dadus ró nian hatudu supertanker tolu ne’ebé maka liu nafatin hosi estreitu iha loron-sábadu. Ró sira-ne’e maka sai dahuluk hosi Golfu dezde fó sai sesarfogu.
Jornalista: Arminda Fonseca
Editór: Rafael Ximenes de A. Belo
