KOVALIMA, 13 Abríl 2026 (TATOLI) – Institutu Nasionál Estatístika Timor-leste (INETL.I.P) fasilita treinamentu kona-bá estabilizasaun sistema kolesaun dadus dijitál (CRVS) ba xefe suku no pesoál apoiu suku sira iha Munisípiu Kovalima.
Prezidente INETL.I.P, Elias Dos Santos, esplika katak INETL.I.P la’os foin mak fasilita treinamentu kona-bá kolesaun dadus, maibé molok fasilita ona treinamentu bainhira sei uza hela surat tahan, maibé dadaun ne’e kontinua fasilita treinamentu tanba uza ona sistema dijitál.
“Ami la’os foin mak fasilita treinamentu antes ne’e fó kedas ona treinamentu atu koleta dadus uza ho manuál, maibé daudaun ne’e ita uza ona sistema dijitál tanba ne’e ha’u nia treinadór mak sei partilla materiál ba ita boot sira”, Prezidente INETL.I.P, hato’o liuhusi nia diskursu, iha salaun CNE, Tabakolot, Kovalima,ohin.
Prezidente ne’e dehan, INETL.I.P la’os foin mak hala’o treinamentu iha munisípiu Kovalima, maibé hala’o ona iha munisípiu sira seluk ikus liu mak iha munisípiu Kovalima, Lautein no RAEOA sei hein, tanba relasiona mudansa Prezidente Autoridade RAEOA bainhira loos ekipa INETL.I.P ba ona iha RAEOA.
INETL.I.P fasilita treinamentu ne’e ho nia objetivu, tanba daudaun-ne’e ko’alia kona-bá mundu dijitalizasaun, molok ne’e INETL.I.P fasilita treinamentu ba pesoál administrasaun halo koordenasaun ho Ministériu Administrasaun Estatál (MAE), nune’e publikasaun dadus hanesan laiha diferénsia.
Treinamentu kona-bá estabilizasaun kolesaun dadus ho sistema dijitál (CRVS) importante tebes bainhira Ministériu balun presiza dadus ajusta de’it ona programa.
“Atu rekolla dadus ,daudaun ne’e Ministériu Solidariedade Sosiál no Inkluzasaun (MSSI) servisu hamutuk ho WFP hodi halo rekrutamentu hodi halo monitorizasaun no avaliasaun kona-bá programa bolsa da mãe no programa sira seluk hodi hatene nia benefísiu nune’e tempu badak ekipa sei fó sai rezultadu “nia dehan.
INETL.I.P mós halo peskiza ba empreza nune’e atu hatene kontribuisaun taxa empreza ba Governu ne’e hira no peskiza ba orfanatu sira bainhira hetan benefisiu husi Governu ka parseiru no mós peskiza ba traballadór ne’ebé mak servisu iha rai li’ur nia benefisiu barak, maibé difisil halo investimentu iha Timor.
INETL.I.P fasilita treinamentu ba xefe suku no fusnionáriu suku ne’e, hala’o durante loron tolu hahú iha loron 13 Marsu ne’ebé sei remata iha loron 15 fulan-Abríl tinan ne’e.
Iha sorin seluk,Reprezentante Prezidente Autoridade Munisípiu Kovalima, Alberto Moniz de Araújo dehan, atividade treinamentu ne’e importante ba xefe suku no pesoál apoiu suku ligadu ho dadus monografia no demografia, tanba organiza mós husi INETL.I.P ba iha postu administrativu sira.
“Ita bo’ot sira tenke aproveita treinamentu ho sériu nune’e bainhira la komprende bele husu pergunta espesiál liuliu ba ofisiál suku sira ne’ebé Governu halo rekrutamentu atubele kumpre no labele moe atu husu pegunta,” nia dehan.
Autoridade Kovalima ne’e fó hanoin ba xefe suku no funsionáriu ofisiál suku sira treinamentu ne’e importante relasiona atu rekolla fixa família liga ho funsionáriu suku sira-nia servisu.
Jornalista: Celestina Teles
Editór: Florencio Miranda Ximenes
