DILI, 13 Abríl 2026 (TATOLI)—Eletrisidade Timor-Leste, Empreza Públika (EDTL, E.P) rekolla reseita hamutuk millaun $18-resin iha trimestre dahuluk, hahú husi fulan-Janeiru to’o Marsu.
Vise-Prezidente Eletrisidade Timor-Leste, Empreza Públika (EDTL, E.P), Júlio de Jesus Gonçalves, hateten reseita ba trimestre dahuluk—hahú husi fulan-Janeiru to’o Marsu hetan ona hamutuk millaun $18-resin liuhusi programa sira hanesan faan token enérjia, ema aluga poste riin, ligasaun ilegál, dokumentu konkursu públiku nomós osan ne’ebé ita depozita iha banku,
“Iha atividade ka programa ida mak rekolla reseita barak-liu ne’e mak faan token enérjia, tanba kada loron sidadaun barak mak sosa pulsa ahi hodi ense ba kontadór. Tanba ne’e, ba tinan ida-ne’e, ita alvu rekolla reseita to’o millaun $70. Ne’ebé, husi alvu ne’e ita hetan ona 26,63%,” Vise-Prezidente EDTL ne’e informa ba Agência Tatoli iha nia kna’ar fatin Kaikoli, ohin.
Husi prosesu rekolla reseita ne’e, nia dehan, sira sempre hasoru difikuldade hanesan sidadaun ne’ebé halo ligasaun ilegál, balun haruka invoice ba selu tarde maibé sira sempre halo pagamentu maske prosesu kle’ur uitoan.
“Iha ezekusaun orsamentu ne’ebé EDTL iha aleinde rekolka sira mós halo despeza (gastu) ba servisu institusionál nian, nune’e despeza ne’ebé ita hasai iha trimestre dahuluk kuaze rihun %45-resin (16,81%), kobre husi bens servisu tanba fornesimentu mina ba eletrisidade,” nia esplika.
Maske nune’e, nia garante nafatin servisu EDTL nian bele atinje tuir meta ne’ebé sira iha, tanba iha tinan 2025 ne’e sira konsege ultrapasa tiha meta, nune’e tinan ida-ne’e mós bele atinje ka ultrapasa di’ak liután.
“Iha biban ne’e, ha’u mós hakarak klarifika ba públiku kona-ba hamate ahi iha tempu fim de semana ne’e razaun, tanba tékniku sira halo hela manutensaun servisu iha terrenu,” nia hateten.
Jornalista : Alexandra da Costa
Editór : Cancio Ximenes
