OJE 2026: CLN ezekuta ona 8,2% iha trimestre dahuluk
DILI, 13 Abríl 2026 (TATOLI)—Prezidente Sentru Lojístiku Nasionál, Institutu Públiku (CLN, I.P sigla portugés), António de Araújo Soares, informa CLN ezekuta 8,2% Orsamentu Jerál Estadu (OJE) 2026 hahú husi Janeiru to’o Marsu.
“Ami-nia ezekusaun foin atinje 8.2%, hafoin ita halo alterasaun ba ajustamentu atu halo akizisaun planu asaun aprosionamentu hodi implementa iha trimestre dahuluk,” Sentru Lojístiku Nasionál, Institutu Públiku (CLN, I.P sigla portugés) ne’e hateten ba jornalista iha nia kna’ar fatin, ohin.
Nia dehan, ezekusaun hirak ne’e kobre ba kategória saláriu vensimentu no bens servisu mak sosa foos importasaun husi rai-li’ur inklui sosa haree kulit husi agrikultór sira.
“Entaun, ita-nia estoke foos iha lojístiku sei garante iha liuliu foo ho marka MKAE ne’e ami faan 10kg ho folin baratu $4.50 ba komunidade sira-nia kbi’it, bazeia ba proposta ne’ebé autoridade lokál sira hato’o mai iha CLN,” nia hateten.
Durante ne’e sira faan ona ba munisípiu tolu hanesan Aileu, Ainaru, Lospalos no ohin loron kontinua faan fali iha Líkisa.
Nia hatutan katak sira mós iha planu atu sosa tan foos husi nasaun Vietname, Kambodia, India, hodi halo alterasaun antisipa ba situasaun iha rai laran, bainhira enfreta funu médiu oriente, maibé kuantidade seidauk fixu tanba sira sei haree ba ninia presu.
Entretantu, alokasaun OJE 2026 ba CLN, I.P, hamutuk $4.308.113, ne’ebé kompostu husi saláriu vensimentu $706.286 no bens servisu $3.601.827.
Jornalista : Alexandra da Costa
Editór : Cancio Ximenes
