DILI, 13 Abríl 2026 (TATOLI) – Deputadu husi Partidu Demokrátiku (PD) Armando Lopes preokupa ho implementasaun projetu konstrusaun Uma Dignu balun iha aldeia Be-fitu, Suku Muapitine, Postu Administrativu Lospalos, Munisípiu Lautein ne’ebé seidauk finaliza.
Nia afirma katak Programa Uma Dignu hanesan inisiativa importante Governu nian, liuhusi Ministériu Dezenvolvimentu Rurál no Abitasaun Komunitária, hodi responde ba nesesidade abitasaun povu nian ho dignu. Programa ne’e fundamenta mós iha Konstituisaun ne’ebé garante direitu sidadan hothotu iha uma ne’ebé dignu, seguru no saudável.
Maibé, tuir nia, “realidade iha terenu” hatudu katak iha problema séria ne’ebé presiza tau atensaun imediata, liliu projetu Uma Dignu iha aldeia referida. “Projetu ne’e hala’o tuir kontratu ho kompañia Jeafat Unipesoal, Lda, ho totál unidade 15. Tuir Kontratu, hahú husi 23 Dezembru 2024 no termina iha 23 Dezembru 2025, ho orsamentu hamutuk $ 564.226,74. [Maibé] to’o agora seida’uk finaliza, paradu no abandona totál, maske unidade balun to’o finishing,” Armando Lopes, levanta liuhusi reuniaun plenária Parlamentu, ohin.
Tuir nia, situasaun ida-ne’e implika aspeitu ekonómiku, ne’ebé hamosu prejuízu ba Estadu, tanba ezekusaun obra sira ne’e latermina tuir tempu.
No liga ho aspeitu tékniku bele afeta ba kualidade konstrusaun no hamosu kustu adisionál iha futuru, no kontratór la kumpri obrigasaun kontratu nian presiza reforsa responsabilizasaun.
“Ha’u husu ba ministériu atu foti medida rigór ba kontratór ne’ebé la kumpri kontratu, inklui multa no medida administrativa, tuir lei ne’ebé vigora,” parlementar ne’e sujere, tanba ne’e, nia akresenta katak presiza halo auditória téknika independente hodi avalia kondisaun obra atuál no garante kualidade.
Aleinde ne’e, Nia mós husu atu halo revizaun ba kustu unidade ne’ebé to’o $ 37.717 ba uma ida ho dimensaun 13 x 9,9 metru, ne’ebé kompostu husi kuartu haat, varanda rua, sala jantar ida, haris fatin ida no dapur ida, atu asegura katak kustu ne’e rasionál ho kualidade obra.
Nia mós destaka katak presiza mós halo revizaun ba kustu no mekanizmu implementasaun hodi asegura transparénsia no efisiénsia iha uza finansa públika
Hatán ba preokupasaun ne’e, reprezentante Governu liuhusi Vise-Ministru Asuntu Parlamentare, Adérito Hugo da Costa, hateten katak parte Governu seida’uk iha informasaun klaru kona-ba razaun abandona projetu ne’e, nune’e sei envia ba Ministru tutela hodi tau atensaun.
Notísia relevante: Governu tau ona timeline ba implementasaun Uma Dignu iha Tunubibi
Jornalista: Nelson de Sousa
Editora: Isaura Lemos de Deus
