BAUKAU, 13 Abríl 2026 (TATOLI) – Ekipa Veterinária husi Ministériu Agrukultura, Pekuária, Peká no Floresta (MAPPF) Munisipál Baukau, rejista kazu raiva hamutuk Baukau hamutuk haat kompostu husi pozitivu rua no suspeitadu rua.
Médika Veterinária husi Ministériu Agrukultura, Pekuária, Peká no Floresta (MAPPF) Munisipál Baukau, Zelia Ximenes, esplika, kazu hirak-ne’e rejistradu bainhira akontese tata komunidade na’in-rua iha aldeia Uaturau, suku Gariuai, aldeia Ana-Ulo Vila Antiga, suku Bahu no rua seluk iha Watulete Vila Nova, suku Tirilolo.
“Kazu rejistradu iha Baukau hamutuk haat hanesan rua pozitivu no rua suspeitadu,” nia hateten iha edifísiu Servisu Munisipál Saúde Baukaum, Vila Antiga, Segunda ne’e.
Nia relata, husi asu haat ne’ebé parte tÉkniku deteta, hanesan rua-ne’ebé pozitivu bainhira akontese iha suku Gariuai no ida iha aldeia Ana-Ulo no rua seluk suspeitadu bainhira tata animál manu, maske ikus mai komunidade inisiativa hamate asu referida iha área Watulete, aldeia Lutumutu, suku Tirilolo, iha-ne’ebé rezultadu teste ida negativu no ida seluk sei iha faze izolamentu.
Husi asu rua-ne’ebé pozitivu rezulta vitíma na’in-tolu hetan kanek no tenke halo tratamentu iha Ospitál Rejionál Eduardo Ximenes (HoREX, sigla portugés) hanesan na’in-rua feto idade tinan-sia no mane idade 23 husi Suku Gariuai no vitíma mane idade 32 husi suku Bahú.
“Husu komunidade sira atu kontrola asu liuliu kesi no lori ba vásina iha diresaun veterinária munisípiu Baukau,” Zelia Ximenes akresenta.
Nia fundamenta, veterinária Baukau hato’o ona pedidu ba nasionál liuhusi Diresaun Veterinária MAPPF atu imediamente transfere vásina inklui ekipamentu teste laboratóriu no orsamentu operasionál.
Nune’e, Veterinária Baukau rekomenda ba Autoridade Munisipál Baukau hanesan reativa hikas ekipa Task Force prevensaun raiva nune’e foti medida sériu ba virus raiva ne’ebé hahú akontese iha Baukau, sosializasaun ba komunidade liuhusi kolaborasaun ho MAPPF no Ministériu Saúde (MS) no alokasaun orsamentu ba Task Force.
Entretantu, Veterinária Baukau halo ona vásina ba animál iha postu Vemase hamutuk 1.619 kompostu asu 1.541, busa 63 no Makaku hamutuk 15, enkuantu estoke vásina novibon ba animál atúal rezerva doze 185.
Jornalista: Natalino Belo
Editór: Evaristo Soares Martins
