BAUKAU, 14 Abríl 2026 (TATOLI) – Autoridade Munisipál Baukau liuhusi reuniaun koordenasaun Segunda ne’e, hahú reativa hikas ekipa Task Force hanaran Baukau Zero ba Moras Raiva (Bazera) ho objetivu atu halo prevensaun ba virus raiva iha Baukau.
Sekretáriu Munisipál Asuntu Sosiál no Organizasaun, Maria Viegas, esplika, Task Force estabelese iha Agustu 2025 bainhira raiva hahú iha Timor-Leste maibé reativa fali hafoin munisípiu Baukau rejista kazu raiva no kategoriza liña mean iha inisiu fulan-Abríl ne’e.
“Munisípiu Baukau mós kategoria ona ba risku mean, hanesan ekipa Task Force ami tenke esforsu hamutuk ho estrutura tomak atu halo sosializasaun beibeik ba komunidade sira liuhusi Igreja no Eskola sira nune’e estudante sira informa ba inan-aman oinsá halo prevensaun ba raiva,” Maria Viegas hateten iha edifísiu Serbisu Munisipál Saúde Baukau (SMSB) Vila Antiga, Segunda ne’e.
Maria Viegas, relata ekipa Task Force kompostu husi estrutura AMB, Diretór Servisu Munisipál hanesan; Edukasaun, Saúde, Agrikultura, Polísia Nasionál Timor-Leste (PNTL), Komponente Terrestre FALINTILl-FDTL, Igreja, Autoridade postu no suku, ne’ebé lidera direita husi Prezidente Autóridade Munisipál (PAM) Baukau, Veneranda Eurico Lemos Martins.
Nia fundamenta, serbisu dahuluk ne’ebé ekipa Task Force atu halo mak hanesan tékniku Veterinária no pesoál saúde sei ba terrenu halo identifikasuan no vásina ba asu komunidade liuhusi kolaborasaun ho autoridade postu no suku iha Baukau Vila.
Iha fatin hanesan, Médika Veterinária husi Ministériu Agrukultura, Pekuária, Peka no Floresta (MAPPF) Munisípiu Baukau, Zelia Ximenes hateten, ekipa Task Force ne’ebé estabelese presiza iha kooperasaun hodi halo sensibilizasaun ba komunidade no halo prevensaun ba raiva liuhusi vásina ba animál ne’ebé abandonadu iha postu Baukau Vila.
“Ekipa Task Force ne’e tenke forte atubele prevene moras raiva ne’ebé agora iha munisípiu Baukau,” Zelia Ximenes rekomenda.
Totál kazu raiva iha Baukau hamutuk haat’ kompostu rua pozitivu no rua seluk suspeitadu no rezulta vitíma na’in-tolu mak hetan tratamentu iha Ospitál Rejionál Eduardo Ximenes (HoREX, sigla portugés) kompostu mane rua no feto ida.
Jornalista: Natalino Belo
Editór: Evaristo Soares Martins
