OEKUSI, 14 Abríl 2026 (TATOLI) – Xefe Departamentu Eletrisidade de Timor-Leste (EDTL) Rejiaun Administrativa Espesiál Oekusi Ambeno (RAEOA), Antão Cabal, klarifika kona-ba liña elétrika la lakan iha loron tersa-feira ne’e, durante oras 10, komesa husi tuku 2:40 madrugada to’o tuku 11.
“Kauza ne’e akontese iha feeder númeru 02, ohin dadersan madrugada hahú avária iha tuku 2:40 to’o agora tuku 10-resin seidauk lakan, tanba ekipa sira sei rezolve hela,” nia hateten ba Ajénsia TATOLI,I.P iha edifísiu EDTL Oekusi, ohin.
Autoridade EDTL Oekusi ne’e esplika, kauza prinsipál ahi la lakan, tanba ekipamentu ida mutuk naran mak FCO-Kema, ne’e akontese iha feeder 02 nian, sai husi Sentrál Power-Plant Sakato sa’e ba ai-riin, ida-ne’e mak Kema iha ne’ebá, mak mutuk hotu hodi afeta ba kliente sira-ne’ebé utiliza feeder 02, hahú husi igreja Numbei to’o Samoro, tuun fali ba Palaban tomak to’o Lifau.
“Iha vila-laran ne’e liga ho atendimentu avária, tanba bainhira ita atende ka troka FCO-Kema ne’ebé mutuk, entaun tenke hamate feeder 03 kobre hotu área vila-laran, ne’e maka iha tuku 8:00, ami hamate ahi totalmente tanba atu rezolve hela ka troka,” nia hateten.
Ezekutivu ne’e informa, iha prosesu atendimentu avária ne’e, EDTL makfahe ekipa rua, ekipa ida atende avária ne’ebé akontese ona iha Sentrál Power-Plant, no ekipa ida tuun ba terrenu halo limpeza ba ai-horis ne’ebé fó ameasa ba fiu sira presiza hamoos.
Mensajen
“Ha’u-nia mensajen ba kliente tomak iha Oekusi, presiza pasiénsia no kolabora tanba ekipamente ne’ebé mutuk ho naran FCO-Kema ne’e, atu salva ita hotu, no salva mós ekipamentu sira iha Sentrál Power-Plant atu labele afeta tan ba mákina, tanba ekipamentu ne’e avária tanba ita-nia uzu ne’e maka’as, liliu husi nia kbiit no forsa ne’ebé transfere enerjia ba hothotu. Tan ne’e ami husu kolaborasaun atu ita bele koopera bazeia ita-nia kondisaun ne’ebé iha,” nia katak.
Observasaun Jornalista Ajénsi Tatoli,I.P, daudaun ahi lakan ona, komesa husi tuku 11:00.
Jornalista: Abílio Elo Nini
Editór: Rafael Ximenes de A. Belo
