DILI, 14 Abríl 2026 (TATOLI) — Deputadu husi Partidu Demokrátiku (PD) Manuel Henrique Noronha husu ba Governu, liliu Unidade Polísia Marítima (UPM), Komponente Navál Forsa Armada no entidade relevante sira seluk hodi reforsa kontrolu operasaun ró peska ilegál iha tasi Timor.
Nia hatoo pedidu ne’e relasiona ho foin lala’is Fisheries Liaison Officer ka Ofisiál Ligasaun ho Peska husi Empreza ENI halo serbisu peskiza iha tasi, konsege hetan ró hitu husi Indonézia halo peska ilegál iha zona Vikeke.
Tuir nia, país iha ponténsia boot ba setór peska bainhira dezenvolve ho di’ak, sei apoiu ekonomia no kontribui reseita ba Estadu.
“Tanba, ita hatene ikan ne’ebé sira foti ho [kuantidade] boot,” Manuel Noronha kestaun iha Parlamentu, ohin.
Parlamentár ne’e destaka katak presiza aumenta rekursu umanu no ekipamentu hodi apoiu liután serbisu UPM no Komponente Navál nian, tanba ne’e nia akresenta katak ró atuál ne’ebé agora autoridade seguransa utiliza iha ninia kapasidade ladun boot hodi halo operasaun ba tasi klean. Tanba ne’e, Governu presiza tau orsamentu iha futuru hodi sosa tan ró.
Iha fatin hanesan, Vise-Prezidente Komisaun D, ne’ebé trata Asuntu Ekonomia no Dezenvolvimentu, husu mós ba Ministériu Agrikultura, Pekuária, Peska, no Floresta hodi tau iha planu ho objetivu bele dezenvolve setór peska, tanba Parlamentu aprova ona orsamentu kada tinan ba setór ne’e.
Nune’e mós deputadu no menbru husi Komisaun B, ne’ebé trata Asuntu Negósiu Estranjeiru no Defeza ho Seguransa, destaka nesesidade Governu kontinua reforsa apoiu ekipamentu ba UPM hodi halo kontrolu ho di’ak liután no kombate atividade peska ilegál iha tasi.
Tanba durante ne’e, Komisaun B halo fiskalizasaun direta iha terrenu no haree ekipamentu UPM nian liliu ró hodi halo kontrolu ba atividade peska ilegál ne’e menus tebes.
Notísia relevante: UPM koordena ho Komponente Navál hodi responde ba operasaun ró peska ilegál
Jornalista: Nelson de Sousa
Editora: Isaura Lemos de Deus
