DILI, 14 Abríl 2026 (TATOLI) — Parlamentu Nasionál (PN) destaka nesesidade investe iha setór desportivu ho objetivu promove partisipasaun alteta Timoroan iha palku internasionál.
Afirmasaun sira ne’e hatoo husi deputada Partidu Libertasaun Populár (PLP, sigla portugés) Ermenegilda da Costa Laurentina no husi deputadu Kongresu Nasionál Rekonstrusaun Timorense (CNRT, sigla portugés) Gabriel Soares liga ho boxista Timoroan Delio Mouzinho ne’ebé derrotadu hasoru boxista australianu Callum Peters, ne’ebé realiza iha loron 05 fulan-Abríl, iha ámbitu Premier Boxing Champions, iha Austrália.
Kestaun ne’e hatoo, tanba liga mós ho Ekipa Selesaun Garuda Muda Indonézia halakon Ekipa Selesaun Lafaek Timor-Leste ho 4-1, iha jogu abertura ASEAN Championship Boys 2026 ka Kampionatu ASEAN U-17 Mane 2026, iha Segunda (13 Abril 2026), iha Estádiu Gelora Joko Samudro, Gresik.
“Durante tinan barak, ita-nia atensaun polítika foka liu ba administrasaun loro-loron, maibé la fó atensaun ba desportu hanesan instrumentu estratéjiku atu promove identidade nasionál no prestíjiu internasionál,” Ermenegilda Lauretina hato’o iha Parlamentu, ohin.
Tuir parlamentár, iha desportu modernu la’ós hanesan de’it atividade hodi ema ida-idak hetan previléjiu ba nia-an, maibé desportu nu’udar meiu diplomátiku no bele hamorin nasaun nia-naran iha palku globál.
“Tanba ne’e, Governu presiza investe ho seriedade iha desportu nasionál. [Hahú] husi infraestrutura, formasaun ba atleta to’o iha partisipasaun iha kompetisaun internasionál,” deputada opozisaun ne’e afirma.
Iha sorin seluk, deputadu Gabriel Soares elójia boxista timoroan Delio Mouzinho ne’ebé ho brani tebes lori Timor nia-naran partisipa iha eventu internasionál iha Austrália hodi hasoru boxista sénior sira iha país seluk. Mezmu iha jogu desportu sempre iha manán no lakon, liuliu iha setór boxe nian.
Notísia relevante: Garuda Muda halakon Lafaek 4-0 iha jogu abertura ASEAN Championship Boys 2026
Jornalista: Nelson de Sousa
Editora: Isaura Lemos de Deus
