DILI, 15 Abríl 2026 (TATOLI)–Departamentu Ensinu Lian Tetun, Fakuldade Edukasaun, Arte no Umanidade, Universidade Nasionál Timor-Lorosa’e (UNTL) ne’ebé parseria ho Unidade Pós-Graduasaun no Peskiza husi Universidade Nasionál Timor-Leste no Institutu Nasionál Linguístika (INL), ho inisiativa realiza Semináriu Internasionál Linguístika no Kulturál ho tema ‘Língua, Literatura no Kultura’.
Objetivu husi semináriu ne’e atu valoriza no peskiza ne’ebé dezenvolve husi profesór no estudante finalista sira, simultaneamente hodi kontribui ba promosaun no divulgasaun lian, literatura no kultura timoroan nian.
Diretora INL, Rosa da Costa, informa, lian, kultura, no identidade hanesan dimensaun sira ne’ebé labele haketak tanba iha interligasaun.
“Lian hanesan espellu ba identidade povu ida nian no veíkulu ba nia kultura. Liuhusi lian maka ita identifika identidade indivíduu ida nian. Diversidade kulturál ne’ebé eziste iha Timor-Leste reflete momoos identidade ida-ne’e,” Diretora hato’o ba Ajénsia TATOLI iha Balide, Kuarta ne’e.
Notísia relevante : Governu lokál Japaun husu timor-oan prepara-an ba lian no kultura molok serbisu
Nune’e mós, Diretór Departamentu Ensinu Lian Tetun, Nuno Gomes, hatutan, semináriu ne’e halibur rezultadu peskiza resente ne’ebé dezenvolve iha tinan kotuk husi peskizadór sira iha área hirak ne’e.
Profesór ne’e mós afirma katak eventu ne’e konstitui plataforma akadémika esensiál ida ba fahe koñesimentu sientífiku hodi permite aprezentasaun teze sira iha área linguístika, literatura, no kultura.
“Tanba iha kontestu akadémiku, fundamentál tebes atu observa, analiza, prodús koñesimentu no asegura nia divulgasaun iha fórum sientífiku sira ho natureza ida ne’e,” nia tenik.
Dosente husi unidade Pós-Graduasaun no Peskiza, Vicente Paulino, haktuir, partisipasaun instituisaun nian iha ko-organizasaun semináriu ne’e ho objetivu atu reforsa diseminasaun koñesimentu sientífiku ne’ebé prodús iha ambiente akadémiku, envolve profesór no estudante sira, partikularmente estudante mestradu sira.
Nia dehan semináriu ne’e konstitui espasu ba reflesaun no interkámbiu akadémiku kona-ba asuntu sira ne’ebé relasiona ho linguístika, literatura no kultura, ho foku espesiál ba realidade timoroan nian.
Jornalista : Osória Marques
Editora : Julia Chatarina
