DILI, 15 Abríl 2026 (TATOLI)-Governu liuhusi reuniaun Konsellu Ministru, kuarta ne’e, aprova projetu rezolusaun Governu, kona-ba doasaun ho valór $631.478,11 ba Noble Timor hodi halo likidasaun ba dívida sira-ne’ebé pendente ne’ebé relasiona ho organizasaun edisaun anteriór sira husi Tour Timor (2012), Maratona Dili (2018) no Suai Extreme (2018).
Projetu Rezolusaun Governu nian ne’e aprezenta husi Ministra Finansas, Santina José Rodrigues F. Viegas Cardoso.
Desizaun ida-ne’e ho objetivu prinsipál atu regulariza obrigasaun finanseira relasiona ho organizasaun eventu desportivu sira-ne’e, ne’ebé rekoñese ba nia interese públiku no mós kontribuisaun ba promosaun desportu, turizmu no imajen internasionál Timor-Leste nian.
Nune’e ho rezolusaun Governu nian ida-ne’e, estabelese atribuisaun doasaun ida ba entidade organizadora ba pagamentu dívida ne’ebé identifika ona, nune’e mós obrigasaun atu konfirma, hafoin nia likidasaun katak laiha enkargu pendente sira seluk.
Aleinde rezolusaun Governu ne’e determina mós Ministra Finansa atu garante ezekusaun prosedimentu sira-ne’ebé nesesáriu ba konkretizasaun medida ida-ne’e.
Jornalista : Alexandra da Costa
Editór : Cancio Ximenes
