DILI, 15 Abríl 2026 (TATOLI)—Governu liuhusi reuniaun Konsellu Ministru, kuarta ne’e, aprova projetu Rezolusaun Governu kona-ba kriasaun komisaun interministeriál ba Akompañamentu Projetu Konstrusaun Sentru Konvensaun Internasionál (ICC) ne’ebé atu lansa projetu konstrusaun Iiha Portu Dili.
Proposta ne’e aprezenta husi Vise Primeiru-Ministru, Ministru Koordenadór Asuntu Ekonómiku no Ministru Turismu Ambiente, Francisco Kalbuadi Lay.
Vise-Ministru Asuntu Parlamentár, Aderito Hugo da Costa, hateten ohin halo diskusaun ba aprezentasaun rezolusaun ida husi Gabinete Vise Primeiru-Ministru, Ministru Koordenadór Asuntu Ekonómiku kona-ba kriasaun grupu traballu interministeriál ba konstrusaun Sentru Internasionál Konvensaun.
“Entaun, ohin, deside ohin katak atu lansa iha loron 20 fulan-Maiu agora no grupu traballu interministeriál ne’e kompostu husi ministériu relevante iha setór hotu-hotu liuliu MOP, MPIE no MF,” Vise-Ministru Asuntu Parlamentár ne’e informa ba jornalista hafoin enkontru Konsellu Ministru iha Palásiu Governu.
Nia hatutan, atu nune’e Governu bele iha ona preparativu sira atu bele implementa ona Timor-Leste nia futuru sentru internasionál konvensaun.
Rezoluzaun Governu ne’e kria mekanizmu ida ba koordenasaun interministerial hodi garante akompañamentu permanente ba projetu konstrusaun Sentru Internasional Konvensaun, ne’ebé rekoñesidu hanesan inisiativa estruturante ba dezenvolvimentu ekonomiku, promosaun turizmu no valorizasaun urbana Díli.
Rezoluzaun ne’e estabelese komisaun ida ho natureza teknika no konsultiva, ne’ebé organiza iha grupu traballu rua, grupu traballu ida asume funsaun dezenvolvimentu projetu, ho responsabilidade ba akompañamentu tekniku obra, kontrolu kualidade no verifikasaun ba espesifikasaun konstrusaun nian, enkuantu grupu traballu daruak garante koordenasaun interministerial iha nivel tutelar, ho partisipasaun husi reprezentante ministeriu oioin no entidade públika relevante sira.
Entre funsaun prinsipal sira-ne’ebé atribui ba komisaun ne’e destaka mak akompañamentu ba faze oioin projetu nian, artikulasaun entre entidade envolvida sira, monitorizasaun ba prazu, kustu no risku finanseiru, nune’e mós identifikasaun ba eventual konstrainjimentu no proposta ba medida koretiva. Prevee mós elaborasaun relatóriu periódiu no realizasaun reuniaun regular hodi avalia progresu obra nian.
Enkuantu koordenasaun jerál komisaun nian hela iha responsabilidade Vise-Primeiru-Ministru nian, no apoiu tekniku, administrativu no lojístiku asegura husi nia gabinete, hodi garante efikasia akompañamentu no koerensia iha ezekusaun projetu estratéjiku ne’e.
Jornalista : Alexandra da Costa
Editór : Cancio Ximenes
