INSS rejista idozu no invalidés iha Kovalima hamutuk rihun 7-resin
KOVALIMA,15 Abríl 2026, (TATOLI) – Institutu Nasionál Seguransa Sosiál (INSS) rejista idozu no invalidéz na’in-7,218 mak atu simu pensaun sosiál iha munisípiu Kovalima.
“Bazeia dadus ne’ebé mak iha totál idozu no invalidés mai husi postu administrativu hitu hamutuk 7,218 husi númeru ne’e dadus idozu kompostu husi feto 3,934 no mane 2.909 no invalidés 375 kompostu husi feto 164 no mane 211”, Koordenadór Deskonsentradu INSS Kovalima, Bernardino Sequeira, relata ba Ajénsia Tatoli,I.P, iha knaar fatin,ohin.
Tuir oráriu ne’ebé mak Banku Nasionál Timor-Leste (BNCTL) fó sai katak iha Kovalima sei halo pagamentu pensaun Sosiál faze ba dahuluk iha 2026, hahú iha loron 16 Abríl 2026, pagamentu uluk iha postu administrativu Suai no Fatululik no tuir sei halo pagamentu iha postu administrativu sira seluk ne’ebé mak pertense ba munisìpiu Kovalima.
Dadus ne’ebé mak INSS rejista idozu no invalidés husi munisípiu Kovalima hamutuk 7,218 mai husi postu administrativu sira hanesan ,Postu Administrativu Fohorem Fatululik, Fatumea, Tilomar, Suai, Maucatar no Zumalai.
Tuir dadus idozu no Invalidés kada postu administrativu hanesan husi Fatululik idozu no invalidés mai husi suku rua hamutuk 252 ,Fatumea mai husi suku tolu hamutuk 489, Fohorem mai husi suku haat 544, Maucatar mai husi suku haat hamutuk 1.076, Suai mai husi suku lima 2,193,Tilomar mai husi suku haat 845 no Zumalai mai husi suku ualu 2,038.
Koordenadór ne’e dehan,konaba orsamentu parte munisípiu la hatene tanba prosesu hotu hala’o iha nasionál nune’e munisípiu hein halo kontrola prosesu pagamentu.
Jornalista:Celestina Teles
Editór: Florencio Miranda Ximenes
