KM aprova rezolusaun kriasaun-responsabilidade TL nia adezaun ba GPA no OMK
DILI, 15 Abríl 2026 (TATOLI)—Konsellu Ministru, kuarta ne’e, aprova projetu Rezolusaun Governu nian, ne’ebé aprezenta husi Vise-Primeiru-Ministru no Ministru Koordenadór Asuntu Ekonómiku, Francisco Kalbuadi Lay, ne’ebé estabelese kriasaun no responsabilidades ekipa negosiasaun kona-ba Timor-Leste nia adezaun ba Akordu Kontratu Públiku (Government Procurement Agreement- GPA) Organizasaun Mundiál Komérsiu (OMK) nian.
Tuir nota ne’ebé Agência TATOLI aseu ne’e haktuir, rezolusaun Governu ida-ne’e ho objetivu atu asegura resposta ida-ne’ebé koordenada no téknikamente preparada ba kompromisu ne’ebé Timor-Leste hala’o ona iha ámbitu husi ninia adezaun ba OMK, liuhusi kriasaun estrutura interministeriál ida-ne’ebé responsavel atu prosesa negosiasaun adezaun ba GPA,
Tanba akordu ida-ne’ebé promove transparénsia, konkorrénsia ne’ebé justa no la-diskriminasaun iha kontratu públiku.
Ekipa Negosiasaun ne’ebé foin harii inklui reprezentante husi ministériu oioin no entidade públika sira, hodi garante abordajen ida-ne’ebé koordenada iha setór oioin Administrasaun Públika nian.
Estrutura ida-ne’e lidera husi Xefe Negosiadór ida, ne’ebé responsavel ba hala’o negosiasaun sira, kna’ar ne’ebé hala’o husi VPM-MKAE nu’udar membru Governu responsavel ba Koordenasaun Asuntu Ekonómiku, ka hosi reprezentante ida-ne’ebé Vise-Primeiru-Ministru dezigna, ne’ebé tenke iha esperiénsia téknika ne’ebé luan no komprovadu iha área kontratu públiku no komérsiu internasionál, ho apoiu husi ekipa koordenasaun téknika ne’ebé espesializada.
Ekipa ne’e nia kompeténsia mak atu prepara estratéjia negosiasaun, analiza impaktu husi adezaun ba kuadru legál no institusionál nasionál, elabora proposta oferta asesu ba merkadu, no mós garante koordenasaun ho entidades públikas, setór privadu, no parseiru relevante sira seluk.
Jornalista : Alexandra da Costa
Editór : Cancio Ximenes
