DILI, 15 Abríl 2026 (TATOLI)—Diretór Jerál Servisu Kooperativu iha Ministériu Saúde, Narcisio Fernandes, hateten Ministériu Saúde identifika ona no atu reabilita Fasilidae Saúde ne’ebé kondisaun ladun di’ak ka aat hamutuk 131 ita territóriu.
“Ministériu Saúde iha ona lista postu saúde hirak mak atu halo reabilitasaun, sentru saúde no ospitál munisípiu hirak mak estabelese. Aleinde ne’e aliña mós ho dezenvolvimentu rekursu umanu, tanba ne’e ami iha ona planu atu halo no la’ós 30 maibé planu Ministériu Saúde ne’e hamutuk 131 fasilidade saúde mak presiza halo reabilitasaun ba futuru,” Narcisio Fernandes hateten ba Jornalista sira iha Palásiu Govenu, ohin. Nia afirma, lista fasilidade saúde 131 ne’e maibé depende ba orsamentu aloka mai Ministériu Saúde oinsá mak bele halo reabilitasaun.
“Ho apoiu parseiru sira hanesan UNFPA halo ona reabilitasaun ba materindade sira hamutuk 20 durante tinan rua ho tinan kotuk ate tinan ida-ne’e hamutuk millaun $7 ne’ebé mak husi UNFPA no duadór sira no balun inaugura ona hanesan iha Fatuberliu, no orsamentu balun liuhusi Governu Austrália (DFAT) ne’ebé mak apoiu durante tinan lima (5) no hahú mós reabilitasaun iha Oekusi nomós Ermera ho Dili,” nia esplika.
Tuir nia, aliened ne’e ospitál referál haat (4) iha territóriu mós presiza halo reabilitasaun tanba haree ba kondisaun tenke halo levantamentu profunda atu haree fali ba planu reabilitasaun ba oin.
“Tuir orsamentu ne’ebé mak aloka iha minsitériu saúde, ami-nia planu estratéjia no planu orsamentu ne’e kada postu saúde rihun $25 inklui rezidénsia profisionál saúde sira, maibé depende ba orsamentu ne’ebé mak aloka mai ministériu saúde nian,” nia informa.
Aleinde ne’e, nia relata, Minsiteriu Saúde sei konstrui sentru saúde foun ida iha Postu Administrativu Loes nune’e komunidade bele halo tratamentu iha ne’eba.
Ministériu Saúde sei konstrui mós sentru saúde foun iha Kelikai-Baukau no Loré-Lautein, ida-ne’e sentru saúde foun ne’ebé mak halo no iha ezijénsia mós reabilita sentru saúde tuan uluk halo iha iha primeru Governu.
Ho nune’e, liuhusi KAFI aumenta mós ba orsamentu ba konstrusaun ba sentru saúde sira no mós halo reabilitasaun ba tinan hirak ba kotuk hamutuk millaun $1,5 tanba ida ba kapitál dezenvolvimentu.
Liu husi KAFI aumenta mós orsamentu ba konstrusaun sentru saúde sira no mós halo reabilitasaun ba tinan hirak liu ba aloka millaun $1,5 ba tinan ida, ne’e ba kapitál dezenvolvimentu ba de’it iha retensaun purvolta rihun $800.
“Osan ne’e la sufisiente entaun ami presiza tan. Tanba ne’e mak liuhusi Ministériu Investimentu Estratéjiku (MPIE) nomós husi Ministériu Obra Públika no apoiu mós ADN mós apoiu ba servisu ida-ne’e maka’as,” nia dehan.
Jornalista : Felicidade Ximenes
Editór : Cancio Ximenes
