KOVALIMA,15 Abríl 2026, (TATOLI)- Ministériu Solidariedade Sosiál no Inkluzaun (MSSI) liuhusi Sentru Solidariedade Sosiál no Inkluzaun (SSI) halo reajustamentu dadus Bolsa da Mãe kondisionál iha munisípiu Kovalima.
Pontu Vokál Bolsa da Mãe Kondisionál Kovalima, Nelson de Jesus, dehan Sentru Solidariedade Sosiál no Inkluzaun hahú halo reajustamentu dadus bolsa Kondisionál 2025 ba iha 2026 hamutuk 6,695 hodi rejista no halo reajustamentu sistema sigas Ministériu Solidariedade Sosiál no Inkluzaun (MSSI).
“Bazeia ba dadus Bolsa da Mãe Kondisionál iha 2025 ne’e benefisiáriu hamutuk 6,695 ba inan-aman ne’ebé mak kuidadór labarik hamutuk 3,639 ne’ebé mak halo reajustamentu”, Pontu Vokál Bolsa da Mãe Kondisionál Kovalima, Nelson de Jesus, informa ba TATOLI,I.P iha Kovalima.
Nia dehan, prosesu halo reajustamentu dadus benefisiáriu bele aumenta no bele menus tanba bazeia ba dadus ne’ebé mak tékniku sira rekolla iha terreñu.
Bazeia ba dadus benefisiáriu bolsa da Mãe Kondisionál 2025 hamutuk 6,695 husi dadus ne’e benefisiáriu husi ensinu Báziku Primeiru no segundu siklu ho nia benefisiáriu hamutuk 4,411 benefisiáriu terseiru siklu 1,730, benefisiáriu ensinu Sekundáriu Jerál no ensinu tékniku Vokasionál 542 no benefisiáriu ema ho defisiénsia asesu ba edukasaun iha ensinu báziku hamutuk 12 ho totál nia orsamentu $532,344.
“Dadus 2025, ita kontinua hala’o reajustamentu ita finaliza ona halo reajustamentu ita ensera ona halo reajustamentu nune’e dadus rejista ona iha sistema sigas MSSI hodi prosesu pagamentu iha 2026 ni’an,” nia dehan.
Prosesu reajustamentu finaliza ona maibé seidauk bele identifika benefisia ne’ebé mak elijivél no la elijivél atu simu tanba labarik sira nia idade 17 sistema mak sei esklui de’it.
Jornalista:Celestina Teles
Editór: Florencio Miranda Ximenes
