DILI, 15 Abríl 2026 (TATOLI)—Diretór Nasionál Servisu Investigasaun Kriminál Komandu Jerál Polísia Nasionál Timor -Leste (PNTL), Superintendente Xefe Polísia João Belo dos Reis, hateten, osan ne’ebé mak Servisu Investigasaun Kriminál hamutuk ho komunidade intelejénsia halo apreensaun iha área Bidau Masau, Aldeia Sagrada Família, Suku Bidau Santa-Ana, Postu Administrativu Kristu Rei, Munisípiu Dili, Kuarta ne’e konfirmadu katak osan falsu.
“Ita halo ona ezaminasaun, depoizde ita simu relatóriu husi ita-nia populasaun ne’ebé mak sente vítima ba osan ne’e iha fulan hirak liubá, ita aprezenta kedan ba Banku Sentrál hodi halo ezaminasun, iha ne’ebá sira mós iha osan hanesan ne’ebé mak sira halo komparasaun osan orijinál hatama ba mesin, depois ita hatene katak ne’e falsu kedan iha ne’ebá,” Superintendente Xefe Polísia João Belo, hato’o ba Jornalista sira liuhusi Konferénsia Imprensa ne’ebé halo iha Kuartel Jerál PNTL, Kaikoli, Kuarta ne’e.
Notísia relevante : PNTL halo buska no apreensaun osan iha armazein ida iha Bidau
Nia konfirma katak la’ós lavajen osan maibé ne’e hanesan osan falsu ka falsifikasaun notas. Nune’e DNSIK asegura ona nota sira ne’e iha edifísiu.
“Ita hetan ajuda husi Ministériu Públiku no Diresaun Nasionál Servisu Investigasaun Kriminál halo hela kontajen ba osan ne’e, tanba ne’e ha’u seidauk bele hakle’an buat ruma se kuandu ekipa halo hotu ona serbisu, aban ka bainhira sei relata ba ita-boot sira,” nia katak.
Evidénsia sira ne’ebé Polísia ohin apreende mak tahan kaixa neen inklui kaixa kiik iha balun tan.
Komandante ne’e informa liután, Polísia asegura ona ema na’in-haat ba kazu osan falsu ne’e, ne’ebé sira hanesan na’in ba armazein.
“Sira ita lori mai halo identifikasaun ona iha ne’e, depois iha seluk tan ita sei konsidera sira ne’e nasionalidade husi Xina,” nia katak.
Nia haktuir, osan falsu ne’ebé mak molok ne’e PNTL liuhusi DNSIK halo apreensaun ho montante $4.000 no ohin mak millaun $4.
“Osan ne’ebé molok ne’e Polísia halo apreensaun iha Taibesi foin lalais ne’e no kompara osan ne’ebé foin halo apreensaun millaun $4 osan tahan $100 hanesan de’it. Tanba ne’e, Polísia konsidera osan falsu ne’e durante ne’e sirkula iha Timor-Leste maihusi fatin ne’ebá,” Komandante tenik.
Jornalista : Natalino Costa
Editora : Julia Chatarina
