MNEK-JICA realiza semináriu kona-ba fasilitasaun komérsiu no modernizasaun Alfándega
DILI, 16 Juñu 2026 (TATOLI) —Ministériu Negósiu Estranjeiru no Kooperasaun (MNEK) no Japan International Cooperation Agency (JICA) realiza semináriu kona-ba Fasilitasaun Komérsiu no Modernizasaun Operasaun Alfándega no Janela Úniku durante loron tolu, hahú iha 16 no sei ramata iha 18 Juñu 2026.
Diretora-Jerál Interina ba Asuntu ASEAN, Ralyana Ribeiro, hateten atividade ne’e importante tebes tanba inisiativa ne’e organiza husi JICA no MNEC, liuhusi Projetu JICA-ASEAN, iha kolaborasaun ho Governu Laos.
Semináriu ne’e nia objetivu mak atu hametin kapasidade téknika funsionáriu públiku timoroan sira-nian iha modernizasaun operasaun aduaneira ba implementasaun Janela Únika Nasionál hodi kontribui ba aumentu kompetividade ekonómika nasaun nian no integrasaun sistema nasionál sira iha mekanizmu rejionál ASEAN nian.
Eventu ne’e halibur partisipante hamutuk 50-resin husi ministériu sira hanesan Finansa, Komérsiu no Indústria, no Agrikultura, Pekuária, Peska no Floresta, nomós Servisu Migrasaun no Kontrolu Fronteira, autoridade portuária no aeroportuária, inklui entidade sira seluk ne’ebé envolve iha sistema Janela Únika Nasionál.
Janela Únika Nasionál maka plataforma eletróniku ida ne’ebé kria husi Governu atu simplifika, rasionaliza, no dezmaterializa prosesu sira importasaun, esportasaun, no tránzitu merkadoria. Sistema ne’e funsiona iha forma integradu ho ASYCUDA World, ne’ebé administra husi Autoridade Aduaneira (AA/Alfándega).
Ralyana Ribeiro destaka katak modernizasaun alfándega hanesan prioridade ida ne’ebé identifika ona iha Roteiru Implementasaun Komunidade Ekonómika bloku rejionál nian, hodi kontribui ba integrasaun rejionál no dezenvolvimentu ekonómiku nasionál.
“Bainhira Timor-Leste hakat ba partisipasaun tomak iha Komunidade Ekonómika ASEAN nian, modernizasaun alfándega nian la’ós de’it reforma téknika ida, maibé mós investimentu estratéjiku ida iha futuru ekonómiku nasaun nian”, nia hateten.
Tuir responsavel ne’e, prosedimentu alfándega ne’ebé efisiente, fasilitasaun komérsiu dijitál, no koordenasaun efetivu entre entidade fronteira sira ne’e esensiál atu hamenus kustu atividade ekonómika, promove investimentu, no hasa’e kompetividade Timor-Leste nian iha merkadu rejionál no internasionál.
Konselleiru Sénior husi Projetu JICA-ASEAN, Yuji Ono, hateten katak fasilitasaun komérsiu dudu kreximentu ekonómiku liuhusi hamenus atrazu iha fronteira no kustu tranzasaun, hodi hatutan tan katak modernizasaun alfándega no implementasaun Janela Únika Nasionál mak fundamentál atu Timor-Leste bele hetan benefísiu tomak husi integrasaun ekonómika ASEAN nian.
Iha fatin hanesan, Adjuntu Xefe Misaun Embaixada Japaun nian, Sakai Yuki, subliña katak hametin administrasaun alfándega nu’udar prioridade estratéjiku ida ba nasaun, liuliu konsidera aumentu ne’ebé hein iha fluxu komérsiu hafoin Timor-Leste adere ba organizasaun ne’e.
Komisáriu Autoridade Aduaneira, Joanico Pinto, dehan integrasaun husi Janela Únika Nasionál iha Janela Únika ASEAN nian “la’ós hanesan opsaun ida, maibé hanesan nesesidade ida”, ida-ne’e atu hametin kooperasaun entre instituisaun sira ne’ebé responsavel ba kontrolu fronteira nian.
Dirijente ne’e rekoñese ezisténsia husi dezafiu sira ne’ebé relasiona ho koordenasaun institusionál no sobre pozisaun husi prosedimentu sira inspesaun nian, hodi konsidera katak fahe esperiénsia sira husi Laos sei permite identifikasaun husi solusaun prátika sira hodi aselera modernizasaun Alfándega nian no hadi’a efisiénsia husi serbisu públiku sira ne’ebé liga ba komérsiu internasionál.
Durante loron tolu, partisipante sira sei diskute kona-ba dezafiu sira implementasaun Janela Únika Nasionál, koordenasaun entre entidade governamentál, jestaun risku, kombate kontrabandu, no prátika di’ak liu ne’ebé Laos adota hodi moderniza ninia servisu Alfándega nian.
Jornalista: Arminda Fonseca
Editora: Maria Auxiliadora
