VIKEKE, 16 Abríl 2026 (TATOLI) – Servisu Ministériu Agrikultura, Peskas, Pekuária no Floresta (MAPPF) munisípiu Vikeke kompromete atu kordena ho nível nasionál hodi kontinua hikas programa vasinasaun kontra raiva ba animál, inklui asu, busa no lekirauk, hafoin autoridade saúde deteta kazu raiva iha munisípiu Baukau.
Xefe Departamentu Veterinária, Domingos do Carmo Pinto, informa katak nia parte sei koordena ho nível nasionál hodi kontinua implementa programa vasinasaun antiraiva iha Postu Administrativu Ossu, ne’ebé baliza ho munisípiu Baukau hodi prevene moras raiva tama iha Vikeke.
“Kona-ba programa vasina ba animal sira, liuliu asu, busa no lekirauk, agora daudauk ita paradu hela. Maibé foin lalais ita rona kazu raiva relata rejista iha Baukau, ne’ebé viziñu ho Vikeke. Entaun, ita sei koordena fali ho nível nasionál atu reativa hikas programa vasinasaun iha postu Ossu,” Domingos do Carmo Pinto ba Ajénsia Tatoli, I.P., iha Postu Vikeke Vila, ohin.
Domingos subliña katak programa vasinasaun ba animal tenke hetan orientasaun husi nível nasionál antes munisípiu bele implementa.
“Kazu Baukau ne’e sai hanesan alerta boot ida ba Vikeke. Nune’e, ita tenke halo prevensaun liuhusi vasinasaun. Programa vasinasaun tenke hahu husi Ossu mak ba postu seluk,” nia akresenta.
Nia dehan katak, bainhira akontese kazu raiva iha Vikeke, ekipa sira prontu atu responde, tanba antes ne’e forma ona ekipa task force ida ne’ebé kompostu husi Servisu Saúde Munisípiu Vikeke.
Iha tinan kotuk, ekipa veterinária Vikeke hamutuk ho ekipa nasionál realiza ona vasinasaun kontra raiva ba asu 1,240, busa 68 no lekirauk 5 iha suku Uma Ki’ik no Karaubalu, Postu Vikeke Vila.
Enkuantu iha Postu Administrativu Lakluta, autoridade saúde vasina ona animal 580, kompostu husi animál oin tolu ne’e.
Iha fatin seluk, Diretór Servisu Saúde Munisípiu Viqueque, Aljaksono S. Maia, haktuir katak preparasaun ba moras raiva iha Vikeke di’ak no kontinua hela.
“Kona-ba vizilánsia moras raiva, durante ne’e ita preparadu. Bainhira asu tata komunidade, ita halo kedas prevensaun. Ita rejista ona kazu asu tata ema, maibé seidauk indika moras raiva. Maski nune’e, ita kontinua sensibiliza komunidade sira hodi halo prevensaun,” nia dehan.
Entretantu, Servisu Saúde Munisípiu Vikeke rejista ona kazu asu tata ema hamutuk 90, no laiha indiksaun raiva.
Jornalista: Vitorino Lopes da Costa
Editór: Filomeno Martins
