DILI, 16 Abríl 2026 (TATOLI)—Servisu Rejistrasaun no Verifimasaun Emprezariál, Institutu Públiku (SERVE, I.P), rejista empreza hamutuk 6.492 mak trata dokumentu komersiál, ne’ebé kompostu husi pedidu tolu hanesan rejistu foun, renovasaun no alterasaun (mudansa).
Diretór Ezekutivu Interinu SERVE, I.P, Hélio da Costa, informa iha trimestre dahuluk ne’e (Janeiru-Marsu) sira rejistu pedidu komersiál ba kompania foun hamutuk 1.610, kompostu husi tipu ENIN 904, Unipessoal Lda hamutuk 557, Lda iha 140, Sosiedade Anonimu (S.A) iha ida (1) no Reprezentante Permanente (RP) iha ualu (8).
“Iha fali pedidu renovasaun nian hamutuk 3.699, kobre husi ENIN 1.118, Unipessoal Lda 1949, Lda iha 585, Soaiedade Anonimu (S.A) iha 24, Reprezentante Permanente (RP) iha 22 no Empreza Públika ida (1),” Diretór Interinu ne’e relata ba Agência Tatoli iha nia kna’ar fatin Matadoru, ohin.
Nia hatutan, iha fali pedidu alterasaun ne’e indika ba mudansa fatin katak empreza hakarak muda nia fatin komersiál ba fatin seluk, entaun pedidu ne’e sira konsege rejista hamutuk 1,183, kompostu husi ENIN 200, Unipessoal Lda hamutuk 795, Lda iha 169, Soaiedade Anonimu (S.A) iha 14, Reprezentante Permanente (RP) iha tolu (3) no Empreza Públika iha rua (2).
“Husi servisu sira-ne’e hotu ami mós iha difikuldade liuliu liga ba iha sistema tanba agora daudaun uza sistema finansa nian konesaun ba internete ladun di’ak, entaun kliente sira mai ami labele aselera servisu ho di’ak,” nia dehan.
Tanba sira laiha orsamentu ne’ebé prevee ba kapitál dezenvolvimentu, iha tinan oin sira sei halo proposta tanba sira mós tenke hetan kondisaun di’ak ba infraestrutura nian hodi halo atendimentu di’ak-liu ba kliente sira.
“Enkuantu totál empreza ne’ebé SERVE halo rejistu ba sira-nia pedidu komersiál dezde inisíu tinan 2013 to’o 2026 hamutuk 71.401, kompostu husi ENIN 33.285, Unipessoal Lda 29.103, Lda iha 8.209 sosiedade Anonimu (S.A) hamutuk 134, Reprezentante Permanente iha 661 no Empreza públika hamutuk sia (9),” nia dehan.
Nia hatutan, totál empreza hirak ne’e iha mós balun mak la ativu ona (taka) ne’e hamutuk 990, ne’ebé identifika ENIN iha 81, Unipessoal Lda iha 608, Lda hamutuk 181, Sosiedade Anonimu (S.A) 11, no Reprezentante Permanente (R.P) iha 103.
Jornalista : Alexandra da Costa
Editór : Cancio Ximenes
