DILI, 16 Abríl 2025 (TATOLI)-Ministériu Agrikultura, Pekuária, Peska no Floresta, (MAPPF) planeia, tinan ne’e, atu sosa ró unidade peska hamutuk 16, hodi apoiu ba grupu peskadór sira.
“Tinan ne’e ita sosa de’it unidade 16 tanba ita-nia osan hetan redasaun alokasaun mai Diresaun Peska hetan de’it millaun $1,425, entaun preparasaun orsamentu sosa ró ne’e unidade 16 de’it ho totál orsamentu rihun $105”, Sekretáriu Estadu Peska, Domingos da Conceição dos Santos, hateten iha Ministériu Finansa, kinta ne’e.
Sekretáriu Estadu ne’e rekorda katak iha tinan kotuk ministériu sosa ona ró peska hamutuk unidade 140 ho nia mákina 140 no hahú distribui ona ba grupu peskadór sira – hahú husi Vikeke ró hamutuk unidade 10-resin, Manufahi unidade neen Kovalima unidade hitu, no restu kontinua fahe hanesan Baukau Manatutu, Dili, Likisá, Bobonaru no Oekusi tenke atribui ramata iha tinan ne’e.
“Orsamentu ba akizisaun ró 140 husi empreza rua mak Auto Zone sosa ró unidade 100 osan $744.080 no Seramor unidade 40 osan hamutuk rihun $216”, governante ne’e relata.
“Maibé, iha tinan kotuk mós ita mós prevee orsamentu hamutuk rihun $80 halo produsaun ró ida 5 Gross Tonnage (GT) ne’e prosesu iha dalan mai, ida-ne’e hanesan prosesu pilotajen ida hodi bele sukat nível médiu atividade nian. Aumezmu tempu atu observa nia kapasidade kaptursaun ikan ne’e to’o iha ne’ebé nune’e ita propoin tan atu hola”, nia énfaze.
Lembra katak, iha 2022, ministériu mós sosa ona ró 110 ne’ebé, fahe ona ba peskadór sira, liuliu iha zona kosteira súl nasaun nian, hanesan iha Manatutu-Natarbora, Kovalima-Suai no Bobonaru-Atabae. Distribuisaun ró ne’e kontinua iha tinan ne’e.
Jornalista: Arminda Fonseca
Editór: Rafael Ximenes de A. Belo
