VIKEKE, 16 Abríl 2026 (TATOLI) – Responsável ekipa tékniku husi Ministériu Agrikultura, Peskas, Pekuária no Floresta (MAPPF) halo manutensaun ba eskavatór ne’ebé avaria iha Postu Administrativu Uatulari, Munisípiu Vikeke.
“Ita-nia ekipa tékniku husi MAPPF ohin to’o ona iha Postu Uatulari. Daudauk ne’e, sira halo hela manutensaun ba eskavatór ne’ebé antes ne’e a’at,” Vicente Rui Soares dehan ba TATOLI, I.P., iha Postu Uatulari, ohin.
Nia dehan katak, kuandu manutensaun remata, ekipamentu hirak ne’e sei mobiliza ba terrenu atu halo normalizasaun ba irrigasaun sira hodi fornese bee ba natar.
Nia hateten katak durante eskavatór a’at, agrikultór sira hato’o pedidu barak atu normaliza irrigasaun sira, tanba ne’e agora ekipa sira konsege halo ona manutensaun.
Vicente relata katak normalizasaun sei kobre irrigasaun lubuk ida, inklui Xabatula, Bebui, Asasapa Isi no mós Betubo’o.
Normalizasaun irrigasaun sira-ne’e importante hodi fornese bee ba natar sira iha suku Saeketu, Makadike de Baixo, Makadike de Cima, Makadike Uaitame, Afoloikai no suku Matahoi, Postu Uatulari.
Jornalista: Vitorino Lopes da Costa
Editór: Filomeno Martins
