DILI, 16 Abríl 2026 (TATOLI)—Primeiru-Ministru, Kay Rala Xanana Gusmão, hateten Polísia Nasionál Timor-Leste (PNTL) halo duni apreensaun ba osan falsu maibé seidauk simu relatáriu no husu parte seguransa atu halo investigasaun kle’an.
Notísia Relevante: Deteta osan falsu millaun $4, MI apresia serbisu intelijénsia
“Investigasaun mak tenke kle’an, atu hatene osan ne’e tama husi parte ida-ne’ebé, ita haree de’it katak rihun $20 de’it ita bele tau iha bolsu, maibé millaun $4-resin ne’e, horisehik, ha’u haree tau iha kaixa kiik, kada kaixa ida rihun $30, barak tebes. Ita buka tuir osan ne’e hatama husi ne’ebé se husi Portu TibarPortu ne’e, sira tenke responsabiliza. Tama husi aviaun ne’e labele, barak tebes. Buat rua de’it, husi Portu Tibar ou liuhusi rai-maran. Investigasaun tenke ke’e kle’an didi’ak,” PM Xanana hateten ba jornalista hafoin hala’o enkontru ho Prezidente Repúblika, José Ramos Horta, sira iha Palásiu Prezidensiál Nicolau Lobato, Bairru-Pite Dili, kinta ne’e.
Xanana esplika, Portu Tibar nia rasik ba haree ona, kada kontentór tama bele haree saida mak iha laran, oinsá mak bele husik liu osan falsu hirak ne’e.
“Horisehik lorokraik bainhira Konsellu Ministru ramata, iha media WhatsApp uihh, ema tau barak loos, ha’u liu ba kantor Polísia sira konta hela istória, relatoriu Polísia nian seidauk to’o mai ha’u,” Xanana hateten.
Nia dehan, maske seidauk simu relatóriu maibé iha relatóriu uitoan katak iha ema ida ba sosa sasán iha loja Centro Pantai Kelapa utiliza duni osan falsu.
“Relatóriu uitoan liu, katak ema ida ba sosa sasán iha loja Centro Pantai Kelapa ne’e, depois loja-na’in deteta katak osan falsu. Nune’e haree tuir CCTV, ema ne’e sa’e nia karreta husi loja ne’e ba nia uma iha Bidau Masaur, nune’e loja-na’in fó hatene ba Polísia, Banku Sentrál, Minsitériu Públiku buka tuir kaer hodi halo investigasaun,” Xanana hateten.
Xefe Governu ne’e subliña, tuir informasaun ne’ebé hetan husi PNTL katak osan falsu ne’ebé Polísia halo aprensaun iha Bidau kuaze millaun $4-resin.
“Horisehik ha’u ba iha kantór Polísia haree sira konta hela osan, kuaze millaun $4-resin. Ha’u informa ona ba Prezidente Repúblika, Prezidente dehan lalika tolera ema-ne’ebé prodús osan ne’e, ka’er hatama liu ba kadeia. Prezidente hateten mai ha’u apresia tebes ita-nia Polísia servisu maka’as tebes,” nia dehan.
Tuir Xanana, relatoriu sei simu no haree didi’ak motivu husi osan referidu, nune’e nia husu ba públiku atu tau atensaun nafatin bainhira hetan osan falsu tenke informa ba parte kompetente.
Jornalista : Hortêncio Sanchez
Editór : Cancio Ximenes
