Xanana husu negosiadór TL-Austrália finaliza dokumentu prosesu negosiasaun greater sunrise
DILI, 16 Abríl 2026 (TATOLI)—Primeiru-Ministru, Kayrala Xanana Gusmão, kinta ne’e, akompañadu husi Ministru Petróleu Rekursu Minerál, Francisco da Costa, hala’o enkontru ho reprezentante Governu Austrália ba greater sunrise, Catrina Cooper, hodi diskute progresu dezenvolvimentu grater sunrise.
Ministru Petróleu no Rekursu Minerál, Francisco da Costa, hateten iha enkontru ne’e Primeiru-Ministru, Kay Rala Xanana Gusmão, husu ba negosiadór husi parte Timor-Leste no Austrália atu kontinua esforsu dudu ba oin no finaliza dokunentu lalais hodi hakat ba prosesu negosiasaun greater sunrise.
“Ohin, mai akompaña Primeiru-Ministru hodi halo enkontru ida ho reprezentante espesiál Governu Austrália ba Greater Sunrise,” Ministru Francisco Monteiro informa ba jornalista sira iha Palásiu Governu,
Governante ne’e dehan, iha loron rua liubá sira halo ona enkontru iha Gabinete MPRM no ohin mai komprimenta fali Xefe Governu, hodi relata kona-ba ideia no progresu oinsá Governu rua bele servisu hamutuk hodi dezenvolve kampu Greater Sunrise ne’ebé ema hotu tau hela atensaun.
“Daudaun ne’e, ita iha hela faze negosiasaun no iha dokumentu prinsipál tolu ne’ebé ita presiza finaliza mak hanesan kontratu fahe produsaun, rejime fiskál, maibé kódigu mineru petróleu finaliza ona,” nia dehan.
Tamba ne’e, Austrália mós nota katak Governu rua liuhusi negosiadór sira konsege finaliza ona dokumentu prinsipál ida mak kódigu mineru petróleu (PMC), nune’e iha fulan-Junu sei iha ronda negosiasaun rua (2) mak ida sei halo iha Kambera Austrália no ida sei halo iha Timor-Leste.
“To’o agora ekipa sira mós halo hela diskusaun ne’ebé intensivu tuir online, nune’e Austrália iha kompromisu dudu prosesu ne’e lalais liután, tamba ohin sira halo enkontru bilateral. Faze tuir mai sei enkontru trilaterál ho kompañia konsórsiu sira, tanba dokumentu sira hetan alinamentu ona husi kompañia konsórsiu,” Ministru Francisco informa
Aleinde ne’e, nia dehan, husi tempu ba tempu investór sira-ne’ebé halo hela esplorasaun mina ne’e hanesan enkontru kortézia, enkuantu investór foun sira hanesan oportunidade tanba hanesan nasaun nafatin konvida kompañia sira, importante sira iha teknolojia no osan atu lori mai investe iha Timor no Timor sempre nakloke.
“Husi enkontru ne’e, Primeiru-Ministru, Kay Rala Xanana Gusmão mós kontinua apoiu atu dudu prosesu ne’e ba oin no solisita ba negosiadór sira ajuda aselera prosesu ne’e ho lalais ba dezemvolvimentu greater sunrise,” nia dehan.
Jornalista : Alexandra da Costa
Editór : Cancio Ximenes
