DILI, 17 Abríl 2026 (TATOLI)-Ministériu Interiór, Francisco da Costa, rekoñese atividade ilegál kontinua mosu iha tasi Timor tanba ekipamentu ró ba patrullamentu seidauk sufisiente atu halo patrullamentu to’o tasi-kle’an.
Nia rekoñese, maske ho difikuldade ne’ebé iha, sira nafatin halo esforsu liuliu Unidade Polísia Marítima (UPM) hametin koordenasaun ho Ministériu Defeza, Ministériu Agrikultura, Pekuária Peska no Floresta (MAPPF) hodi reforsa seguransa no kontrolu iha tasi nasionál, tanba atividade peska ilegál sei aas hela no ameasa rekursu tasi.
“Ita-nia kapasidade patrullamentu ró ne’ebé atu tama ba tasi-kle’an ne’e seidauk sufisiente, entaun labele halo patrullamentu to’o tasi-kle’an, maibé ita buka hela meiu atu bele kontrola tasi”, Francisco da Costa hateten.
Nia esplika, serbisu koordenasaun entre ministeriál importante hodi monitoriza operasaun iha área tasi-klaran.
Ministru Agrikultura, Pekuária, Peska no Floresta, Marcos Da Cruz hateten, peska ilegál sai hanesan problema ida-ne’ebé presiza atensaun boot, tanba iha indikasaun ró estranjeiru balun tama iha área tasi Timor-Leste nian laiha lisensa ofisiál.
“Ita-nia tasi peska ilegál ne’e barak, entaun ita halo koordenasaun ho PNTL ho F-FDTL atu halo intervensaun, maibé ita-nia problema ne’e mak ita seidauk iha portu peska nian, entaun seidauk bele fó lisensa ba ró boot ne’ebé kaer iha tasi kosta súl”, nia dehan.
Governante ne’e subliña, parte relevante sira sempre koordena malu haree ba asuntu ne’e tanba iha ona sistema ne’ebé bele deteta ró ilegál tama sai iha tasi Timor maibé ida-ne’e ligadu ho fronteira marítima entaun sai difikuldade ida tanba nasaun rua ne’e seidauk iha desizaun definitiva ba fronteira tasi entre Timor-Leste ho Indonézia.
“Entaun sira-nia ró tama, ita ba sira tama tiha ba sira-nia área dehan la’ós ilegál ona, ida-ne’e sai problema ida-ne’ebé kompleksu maibé ita nafatin iha koordenasaun Polísia Marrítima no Ministériu Defeza Forsa Navál hodi asuntu ne’e, tanba ita seidauk iha ró boot atu tama tasi kle’an”, nia konklui.
Jornalista: Arminda Fonseca
Editór: Rafael Ximenes de A. Belo
