DILI, 17 Abríl 2026 (TATOLI)—Delegasaun Federasaun Sindikatu Globál (FSG) husi Austrália, hala’o enkontru ho Primeiru-Ministru, Kay Rala Xanana Gusmão, reafirma sira-nia kompromisu hakarak promove direitu traballadór iha servisu fatin.
Diretora Ezekutiva Union Aid Abroad, AFIDA, Claire Middlemass, sente onra tebes hamutuk ho delegasaun sira husi federasaun sindikatu global, ACTU, KSTL bele halo enkontru ho Primeiru-Ministru, Xanana Gusmão.
Servisu Union Aid Abroad Afida, ho sindikatu globál sira-ne’ebé reprezenta setór inklui edukasaun, servisu públiku, finansa, komérsiu, konstrusaun, jornalizmu, hodi hametin koordenasaun no parseria ho sindikatu no traballadór sira iha Timor-Leste no rona kona-ba kestaun sira-ne’ebé traballadór sira iha Timor-Leste hasoru iha servisu fatin.
“Impulsu ba ami-nia vizita mak parseria foun ba programa servisu dignu ne’ebé finansia husi Governu Austrália hodi apoia servisu dignu no dezenvolvimentu ekonómiku iha ita-nia rejiaun liu husi parseria traballadór,” Diretora ne’e informa ba jornalista sira iha Gabinete Fronteira Marítima, Palásiu Governu, ohin.
Aleinde ne’e, nia dehan, objetivu husi parseria ne’e atu alkansa Objetivu Dezenvolvimentu Sustentavel, liuhusi apoia kapasitasaun no harii konsiénsia kona-ba protesaun no direitu iha fatin servisu, garante igualdade jéneru, reziliénsia klimátika no diálogu sosiál.
“Iha ami-nia enkontru ho Primeiru-Ministru ohin, ami diskute ami-nia kompromisu hamutuk hodi rezolve kestaun sira-ne’ebé traballadór sira iha Timor-Leste hasoru. Ami diskute importánsia servisu ho kualidade, servisu dignu, saláriu dignu, apoiu ba foinsa’e sira no importánsia diálogu sosiál, no ami reafirma ami-nia kompromisu atu servisu hamutuk iha solidariedade,” nia dehan.
Iha oportunidade ne’e, Primeiru-Ministru, Kay Rala Xanana Gusmão, hato’o agradeseimentu ba ekioa delegasaun sindikatu, delegasaun sira-ne’e mai husi rai oioin, ne’ebé mai atu ko’ali kona-ba situasaun traballadór sira-nia iha servisu fatin.
“Ne’eduni, di’ak tabes, tanba durante tinan-24 ita terua tebe-tebes, Australian Trade Union, no sira mak apoiu tebes ita. Nune’e, agora sira mai fali atu observa no apoia ita iha área formasaun ba traballadór sira,” Xanana hateten.
Jornalista : Alexandra da Costa
Editór : Cancio Ximenes
