Deteta krime utiliza teknolojia, membru PNTL feto tenke tau importánsia ba edukasaun
DILI, 17 Abríl 2026 (TATOLI)–Segundu Komandante Jerál Polísia Nasionál Timor-Leste (PNTL), Asistente Komisária Polísia Natercia Martins, enkoraja membru hotu liuliu membru PNTL feto sira atu tau importánsia ba edukasaun, tanba iha futuru sei hasoru dezafiu oinsá deteta krime sira-ne’ebé utiliza teknolojia.
“Ita tenke prepara-an atu hola responsabilidade hanesan Polísia liuliu Polísia feto sira. Primeiru mak ne’e, tenke tau importánsia ba sira-nia edukasaun, tanba ba oin ita sei hasoru dezafiu barak, dezafiu ida-ne’ebé ita hasoru mak oinsá ita iha kapasidade atu deteta krime sira-ne’ebé utiliza téknolojia,” Asistente Komisária Natercia Martins hateten ba jornalista sira iha Palásiu Prezidensiál Nicolau Lobato, Bairru Pite. ohin.
Tanba ne’e, nia husu membru sira hotu atu kontinua aprende iha área saida de’it hodi hasoru dezafiu todan ne’ebé sei akontese iha futuru ho téknolojia ne’ebé avansadu.
“Prosesu ida aprendizajen ne’e importante. Sira-ne’ebé mak ramata ona eskola sekundária tenke kontinua ba Universitdade hodi foti kursu hirak ne’ebé relasaun ho dezafiu sira atu mai iha futuru ne’e mak hanesan IT, téknolojia informátika, jestaun finansa no seluk tan. Buat hirak ne’e sai mós ezijensia ida ba instituisaun Polísia nian rasik, la’ós de’it rekrutamentu báziku hodi hatene de’it halo funsaun Polísia nian hanesan investigasaun, polisiamentu komunitária, tránzitu rodoviaria, maibé tenke aumenta liutan kapasidade ba espesializasaun iha área sira ha’u temi ne’e,” nia dehan.
Nia hatutan, membru sira tenke lee barak no labele gasta tempu ho mídia sosiál sira-ne’ebé la fó benefisiu hodi kapasita-an ba koñesimentu ba situasaun global. maibé aprende oinsá hasa’e ida-idak nia abilidade iha área espesífiku sira.
“Ida fali mak ne’e dixiplina, komportamentu tenke kontrola, ita-nia atetude, mentalidade, tenke iha mehi ida katak nasaun ne’e ba oin. Idade sira hanesan ami-nian ne’e tama iha klaran, iha ona dalan atu ba reforma, sé mak atu mai substitui, ita-nia alin joven sira mak atu mai, nune’e duni tenke prepara-aan hahú agora. Dezenvolvimentu agora ba oin presiza ema-ne’ebé matenek hodi hasoru dezafiu sira,” nia hateten.
Tuir nia, Timor-Leste seidauk iha krime organizadu maibé vulneravel atu hetan ameasa husi krime referidu.
“Ita laiha krime organizadu, maibé ita-nia nasaun ameasa atu hasoru krime ida-ne’e. Haree husi númeru dezempregu aas, joven sira barak la fó importansia ba edukasaun, la respeita inan-aman fó morál, gosta ransu no gosta mete buat ne’ebé la fó benefisiu ba sira-nia an no sira-nia futuru,” nia dehan.
Jornalista : Hortencio Sanchez
Editór : Cancio Ximenes
