Formandu na’in-40 tuir formasaun agríkola iha CDC Baukau
BAUKAU, 17 Abríl 2026 (TATOLI) – Formandu hamutuk na’in-40 tuir formasaun iha área agríkola iha Sentru Dezenvolvimentu Komunitária (CDC, sigla portugés) munisípiu Baukau.
Diretór CDC Baukau, Vicente Matos Belo, esplika, formandu hirak-ne’e tuir formasaun durante fulan-neen konba agrikultura jerál no ortikultura.
“Métodu formasaun iha-ne’e iha aula rua hanesan dadeer formandu sira aprende teoria no dadeer kontinua ho prátika,” Diretór CDC hateten iha ninia kna’ar fatin Triloka, Sesta ne’e.
Vicente Belo relata, formandu na’in-40 kompostu klase sertifikadu I hamutuk na’in-20 no na’in-20 seluk kategoriza klase sertifikadu II ne’ebé maihusi munisípiu Vikeke, Lautem, Aileu, Ainaro no Baukau ho totál formadór hamutuk 12.
Alende ne’e, CDC koloka matéria hamutuk 14 tuir kurríkulu ne’ebé akredita husi INDIMO hanesan planta indústria, seguransa agrikultór, ambientál, agro florestrál iha-ne’ebé bainhira prátika sei hahú etapa sira hanesan preparasaun fatin, marka distánsia tuir liña, kuda no manutensaun inklui kolleta.
“Formandu sira antes gradua sei ba estajiu profesiónal durante fulan-rua iha fundasaun Jape,” Vicente Belo akresenta.
Entretantu, CDC Baukau iha esperansa liuhusi formasaun bele aumenta koñesimentu espesialista iha área agríkola nune’e futuru bele sai traballadór profisiónal no loke kampu traballu iha idaidak nia área.
Jornalista: Natalino Belo
Editór: Evaristo Soares Martins
