KOVALIMA , 17 Abríl 2026, (TATOLI)- Vise Ministru Asuntu Infraestrutura, Júlio do Carmo, akompaña husi Sekretáriu Estadu Formasaun Profisionál no Empregu, Rogério Araújo Mendonça Sekretáriu Estadu Dezenvolvimentu Lokál (SEDL), hamutuk ho Autoridade Kovalima inaugura edifísiu SEFOPE foun no entrega sertifikadu dalén Inglés ba formandu na’in-68.
Governu liuhusi SEFOPE entrega sertifikadu ba kandidatu traballadór ne’ebé mak durante tuir kursu dalén inglés durante fulan-tolu iha sentru formasaun dalén inglés iha lakonak, suku Debos, Postu Administrativu Suai.
“Inaugurasaun edifísiu foun SEFOPE no sentru formasaun dalén inglés hodi prepara ba joven-sira hodi tuir formasaun iha munisípiu Kovalima”, Sekretáriu Estadu Formasaun Profisionál no Empregu, Rogério Araújo Mendonça hato’o liuhusi nia diskursu molok inaugura sentru formsaun no edifísiu oun SEFOPE iha Lakonak.
Governante ne’e mós, apresia ba empreza na’in rua mak hanesan empreza feto lima konstrui sentru formasaun no empreza Jino Linda, Lda konstrui edifísiu foun SEFOPE tanba kumpre kompromisu nune’e sai duni realidade hodi fó benefìsiu ba joven-sira.
Ho konstrui edifísiu SEFOPE foun hamutuk ho sentru formasaun dalén inglés Kovalima sai ezemplu ba iha fatin sira seluk, tanba sentru formasaun besik edifísiu SEFOPE , nune’e Diretór SEFOPE ho nia funsionàriu SEFOPE bele kontrola kualidade ba sentru formasaun.
Politika Governu konstrui sentru formasaun iha munisípiu hodi lori besik sentru formasaun mai iha komunidade sira nune’e joven-sira labele ba ona Dili tanba gasta osan bo’ot , maibé tuir de’it iha Munisípiu.
“Ita inaugura edifísiu no sentru sentru formasaun inglés espera sei espanda tan sentru formasaun ne’ebé mak merkadu traballu presiza”, nia fó hanoin
Governu lori sentru formasaun mai iha munisípiu ba formandu ne’ebé mak simu ona sertifikadu ne’ebé mak tuir formasaun durante fulan-tolu ,maibe presiza mós tuir formasaun área seluk mak hanesan formasaun jerál ospitalidade no seluk tan.
Kandidatu traballadór ba Austrália na’in-68 kompostu husi mane 47 no feto 21 ne’e hahú tuir formasaun dalén inglés iha loron 15 Setembru 2025 ne’ebé ramata iha 15 Dezembru 2025.
Iha fatin hanesan, Prezidente Autoridade Munisípiu Kovalima, Miguel Armada Cardoso hato’o agradese ba SEFOPE tanba bele konstrui ona edifísiu tolu iha Munisípiu Kovalima
“Ita agradese ba SEFOPE tanba bele konstrui ona sentru formasaun inglés rua hamutuk ho edifísiu SEFOPE,” nia afirma.
SEFOPE mak fasilita timor-oan sira atu bá servisu iha rai li’ur hanesan Austrália, Korea no nasaun sira seluk presiza hatene dalén inglés.
Autoridade Kovalima mós hato’o agradese ba empreza Jino Linda Unpesoal Lda,tanba empreza ne’e konstrui obra tuir duni kontratu.
“Ha’u lia menon fatin formasaun besik ona komunidade, maibé joven sira tuir formasaun ladun másimu tanba autoridade postu sira atu organiza joven-sira tuir formasaun”, nia dehan.
Entretantu, Diretór Empreza Jino Linda Unipesoál Lda, Mozinho Barros, dehan empreza finaliza obra ne’e durante fulan-haat tanba empreza hahú asina kontratu 21 Agusto no ramata 23 Dezembru 2025 durante fulan-haat.
“Ita hala’o ona inaugurasaun ba edifísiu SEFOPE foun ho medida 14×14,” nia relata.
Jornalista:Celestina Teles
Editór: Florencio Miranda Ximenes
