DILI, 17 Abril 2026 (TATOLI)—Diretór Servisu Apoia Diagnostiku Terapéutiku iha Hospitál Nasionál Guido Valadares, Vidal de Jesus Lopes klarifika Hospitál Nasionál Guido Valadares kansela pasiente ida-ne’ebé mak hetan asidente iha semana kotuk atu halo operasaun maibé la konsege tanba nia ho problema fuan.
Kona-ba prekupasaun husi Parlamentu Nasionál kona-ba pasiente ida-ne’ebé mak foin daudaun hetan asidente mai iha sala operasaun iha Hospitál Nasionál Guido Valadares atu halo operasaun maibé la konsege.
“Ida-ne’e kestaun tékniku. Ha’u buka ona informasaun katak ida-ne’e problema tékniku. Primeiru, labele opera tanba oras mak la to’o. Segundu, kansela tanba pasiente kondisaun rasik suspeita katak iha problema fuan,” Vidal de Jesus Lopes bá Jornalista sira iha nia kna’ar fatin, ohin.
Nia esplika, kazu hanesan ne’e presiza espesialista husi kardiolojia haree tiha lai mak foin bele halo operasaun.
“Ne’e presiza kardiolojista sira haree tiha lai, depois mak halo operasaun. Bainhira liman ho ai tohar, presiza pasiente nia kondisaun fuan mós tenke di’ak, bainhira operasaun sei hetan anastesia. Ho razaun rua ne’e mak sei demora, maibé ohin bele fó ona solusaun ba pasiente nia problema ne’e,” nia dehan.
Nia esplika, pasiente refere tama iha loron 09 fulan-Abríl ho asidente saida loos maibé presiza halo konfirmasaun ho médiku sira la’o.
“Pasiente ne’e tama iha 09 Abríl liu ba, karik nia mai ho asidente saida presiza konfirma fali ho doutór sira lai. Maibé tuir informasaun dehan katak pasiente ne’e nia liman tohar, pasiente ho tinan 20, ne’ebé agora kontínua baixa iha HNGV hodi halo tratamentu,” nia esplika.
Antes ne’e,P rezidente Bankada PLP, Maria Angelina Lopes husu ba Ministériu Saúde liuhusi Hospitál Nasionál Guido Valadares atu halo operasaun ba labarik ida-ne’e mak hetan dezastre iha semana kotuk atu halo operasaun maibé to’o iha ona sala operasaun labele halo operasaun no dudu sai tiha fali.
“Vise- Ministru, ha’u mós atu enkamiña mós ba Ministériu Saúde ba asuntu importante ida iha labarik ida mak hetan dezastre iha semana rua ba kotuk, nia tama ona iha oráriu atu halo operasaun, maibé oráriu operasaun dala-rua ona, dudu ona ba tama iha sala operasaun kansela fila-fali. Oráriu atu halo operasaun ba segundu-vés tama ona iha ona lista, maibé kansela fali, ida ne’e ba dala tolu ona no labarik ne’e iha situasaun ida-ne’e mak krítiku tebes. Tanba ne’e mak ami husu señór vise Ministru, favór ida, husu ba Ministra Saúde atu halo atendimentu di’ak iha nia ema sira iha ospitál, haree halo atendimentu didi’ak para labele sakrifika ema sira-ne’ebé mak iha situasaun krítiku iha Hospitál Nasionál Guido Valadares,” Presidente Bankada PLP Maria Angelina Lopes, hateten.
Jornalista : Felicidade Ximenes
Editór : Cancio Ximenes
