KOVALIMA , 16 Abríl 2026 (TATOLI) – Sekretáriu Munisipál Asuntu Finansa Kovalima, Alberto Moniz de Araujo, kinta ne’e, apela ba lideransa komunitária sira atu utiliza rede internet ba asuntu servisu no la’ós ba asuntu privadu.
Alberto Moniz de Arújo apela asuntu ne’e tanba daudaun ne’e Governu liuhosi Ministériu Transporte Komunikasaun distribui no instala ona rede internet starlink iha sede suku sira iha Kovalima hodi dijitaliza servisu administrasaun suku nian iha fuuturu.
“Ho distribuisaun rede internet starlink ba xefe suku sira ne’ebé ita entrega ona rede starlink ofisiál ba autoridade Kovalima no tékniku sira mós halo kedas ona instalasaun rede starlink hahú iha postu administrative no Zumalai kobre iha suku ualu hafoin kontinua bá iha postu administrativu seluk to’o finaliza instalasaun,”nia hateten iha Kovalima.
Nia dehan, ho instalasaun rede internet starlink husi Governu liuhosi MTK sei responde preokupasaun xefe suku sira ne’ebé antes ne’e preokupa atu oinsá atualiza dadus demografia, monografia no servisu administrasaun iha kada suku sei uja sistema manuál.
“Ekipa tékniku instala rede internet ne’ebé ho lais, ha’u hakarak husik hela mensajén ba ita katak uza internet starlink ne’ebé mak lalais hodi hala’o servisu iha suku la’ós uja ba buat ne’ebé mak negativu,”nia apela.
Ho instalasaun rede internet iha suku 30 iha Kovalima, ba futuru nia hateten kada suku ida-idak sei forñese wifi gratuita ba komunidade sira ne’ebé hela besik sede aldeia hodi uja internet ba asuntu estudu no aprende siénsia laós halimar facebook, WhatsApp no seluktan.
Rekorda fila-fali katak, Ministériu Transporte no Komunikasaun foin lalais ne’e entrega ona rede internet starlink ba autoridade Kovalima no ekipa tékniku daudaun ne’e halo hela prosesu intalasaun iha suku sira ne’ebé partense ba munisípiu Kovalima.
Entertantu, Munisípiu Kovalima iha postu administrative hamutuk hitu mak hanesan, Fatululik, Fatumea, Fohorem, Tilomar, Maucatar, Suai no Zumalai ho nia suku 30 Aldeia 148.
Jornalista: Celestina Teles
Editór: Florencio Miranda Ximenes
