DILI, 17 Abríl 2026 (TATOLI) – Parlamentu Nasionál (PN), liuhusi Grupu Nasionál Uniaun Inter-Parlamentár (IPU, sigla inglés) partisipa iha Asembleia Uniaun Inter-Parlamentar ba dala 152 iha Istambul, Turkia, ne’ebé hala’o husi loron 15 to’o 19 Abril.
Eventu ne’e realiza iha Conference Center, Hotel HILTOM BOMONTI no konta ho partisapaun hosi país membru IPU hamutuk 183.
Tuir komunikadu parlamentár, iha loron dahuluk, Grupu Nasionál, lideradu husi Prezidente Grupu, Cedelizia Faria dos Santos, akompaña husi Vise-Prezidente, Ângela Maria Corovelo Sarmento, Sekretária, Maria Teresa Gusmão, Sekretáriu Jerál PN, Edgar Sequeira Martins, deputada Maria Anabela Savio no deputadu Marcos Xavier.
Eventu ne’e hahú ho enkontru Grupu Jeo-Polítiku ba Asosiasaun ba Nasaun Sudeste Aziátiku (ASEAN, sigla inglés) no mós Ázia-Pasífiku nian hodi diskute kona-ba vaga iha kompozisaun meza no draft projetu rezolusaun sira ne’ebé iha, hodi bele hato’o sira-nia proposta kandidatura, no mós kona-ba asuntu sira ne’ebé bele propoin inklui Emergency Item iha ajenda asembleia IPU nian.
Iha tempu hanesan, Ângela Maria Corovelo ho membru sira seluk partisipa iha reuniaun Fórum Feto Parlamentár ba dala-41 no hato’o intervensaun iha debate kona-ba Conflicts on the rise, women’s and girls’ rights on the decline.
Grupu Nasionál IPU, liu husi Prezidenti Grupu, partisipa mós iha konferénsia da-lima Rede Parlamentár Movimentu Naun-Aliñadu nian (NAM PN), ne’ebé hala’o debate konaba The Role of Parliaments in Ensuring Climate-Resilient Urbanization in the NAM area.
Tuir pesoál relasaun públiku husi Parlamentu ne’ebé akompaña delegasaun ne’e, haktuir liuhusi via whatshapp ba Tatoli, ohin, katak deputadu sira husi Timor-Leste sei hato’o mós intervensaun iha reuniaun sira ne’e iha loron tuir mai.
Enkuantu, loron dahuluk remata ho serimónia inaugurál ba eventu IPU iha Istambul no diskursu husi Sekretáriu-Jéral IPU, Prezidente IPU no mós husi Prezidente Parlamentu Turkia nian, ne’ebé apela nafatin ba reforsu diálogu no kooperasaun inter-parlamentár hodi garante dame iha mundu tomak.
IPU hanesan organizasaun globál PN sira. Organizasaun ne’e hahú iha 1889, nu’udar grupu parlamentár kiik ida ne’ebé dedikadu ba promove paz, liuhusi diplomasia parlamentár no diálogu. Hafoin ne’e, transforma-aan ba organizasaun globál ida, ho Menbru nain-183 no Menbru asosiadu nain-15.
Jornalista: Nelson de Sousa
Editora: Isaura Lemos de Deus
