Xefe Estadu orienta PNTL atu halo servisu ho másimu
DILI, 17 Abríl 2026 (TATOLI)–Komandante Jerál Polísia Nasionál Timor-Leste (PNTL), Komisáriu Asistente Polísia Afonso dos Santos ne’ebé akompañadu husi nia Segundu Komandante Asistente Komisária, Natercia Martins, sesta ne’e, hasoru malu ho Xefe Estadu José Ramos-Horta hodi ko’alia kona-ba servisu seguransa no oriente atu hala’o servisu ho másimu.
“Ami na’in-rua mai aprezenta ba Prezidente Repúblika, la ko’alia barak, Prezidente bolu atu halo servisu balun,” Komisáriu Asistente Polísia Afonso dos Santos hateten ba jornalista sira hafoin remata enkontru ho Xefe Estadu iha Palásiu Prezidensiál Nicolau Lobato, Bairru Pite.
Kona-ba kazu osan falsu ne’e mak Prezidente Repúblika bolu, Asistente Komisáriu ne’e rejeita no la tama iha ajende ko’alia ho Prezidente Repúblika.
“Ida-ne’e lae, laiha, ida-ne’e imi husu ba Investigasaun Kriminál mak hatene, servisu Investigasaun ho Servisu Intelijensia sira halo hela servisu. Ami ko’alia ho Prezidente ne’e oinsa Polísia atu servisu ba oin, kazu ne’e ami la ko’alia ida,” nia hateten.
Nia dehan, maioria asuntu ne’ebé ko’alia ho Xefe Estadu sekretu no labele fó sai ba públiku.
“Buat balu sekretu, ha’u labele relata sai iha ne’e,” nia dehan.
Jornalista : Hortencio Sanchez
Editór : Cancio Ximenes
