VIKEKE, 17 Abríl 2026 (TATOLI)-Xefe suku Bahalari Uain, postu Vikeke Vila, munisípiu Vikeke, Ângelo Laranjinha Pinto, informa, Ministériu Agrikultura Peska, Pekuária no Floresta (MAPPF) destaka ona ekipamentu pezadu hodi halo normaliza irrigasaun iha suku Bahalara Uain.
“Durante ne’e, ami problema ho irrigasaun tanba ami-nia natar ne’ebé lokaliza iha suku Bahalara Uain hamutuk ektare 300-resin, maibé natar ne’ebé ativu ne’e ektare 250, entaun foin lalais ne’e ami hato’o pedidu ba Ministru Agrikultura hodi normaliza ami-nia irrigasaun atu ita-nia agrikultór sira halo natar”, Ângelo Laranjinha Pinto, ba Tatoli,I.P postu Vikeke Vila, ohin.
Autoridade komunitária husi Bahalara Uain ne’e aprofunda, pedidu ne’ebé suku Bahalara Uain aprezenta a MAPPF ne’e horseik MAPPF fó ona resposta hodi destaka eskavatór ida iha suku Bahalara Uain hodi normaliza irrigasaun ne’ebé fornese bee ba natar sira hanesan Kiardekun, Kaenlaran, Welaku Bein, Welele Akar no Nahotas.
“Irrigasaun ne’e rai-henek maka taka purvolota 1200 metru, nune’e ekipamentu pezadu sei nomaliza ida-ne’e. Bainhira normalizasaun ba sedimentasaun sira-ne’e hotu, hafoin eskavatór fila. Ha’u hanoin ida-ne’e la normaliza difikulta ba ita-nia agrikultór sira halo natar”, nia konsidera.
Autoridade lokál ne’e dehan, daudauk ne’e ekipamentu pezadu hahú servisu hasai sedimentasaun sira-ne’ebé taka bee dalan sira no intervensaun parte MAPPF nian ba normalizasaun irrigasaun sira-ne’e ajuda tebes povu agrikultór.
“Ha’u sente intervensaun ba normalizasaun ba irrigasaun ne’e ajuda tebes ba ita-nia povu agrikultór sira, atu sira bele halo natar hodi hasa’e produsaun hare iha umunisípiu Vikeke”, nia realsa.
Nune’e, líder komunitária ne’e énfaze, normalizasaun irrigasaun iha suku Bahalara Uain ne’e akompaña diretamentu husi Prezidente Autoridade Munisípiu Vikeke, Francisco C.S. de G. Soares, inklui diretór servisu munisipál sira observa diretamente ba normalizasaun kanál irrigasaun ne’ebé rai-henek taka metin tanba impaktu husi udan boot no mota.
“Ba normalizasaun ne’e ami hamutuk ho ita-nia agrikultór sira sei akompaña ekipa tékniku agrikultura nian hodi hodi tau matan ba normalizasaun irrigasaun. Ha’u fiar katak ho apoia ba normalizasaun ba irrigasaun iha Bahalara Uain nian bele ajuda povu agrikultór sira hodi halo sira-nian natar”. nia realsa.
Entretantu, natar Kiardekun, Kaenlaran, Welaku Bein, Welele Akar no Nahotas ne’ebé lokaliza iha suku Bahalara Uain ne’e sei fó benifísia ba uma-kain 101-resin iha suku Bahalara Uain.
Jornalista : Vitorino Lopes da Costa
Editór : Rafael Ximenes de A. Belo
