VIKEKE, 18 Abríl 2026 (TATOLI) – Ministériu Transporte no Komunikasaun (MTK), liuhusi Diresaun Nasionál Transporte Terestre (DNTT), distribui mákina imprime karta kondusaun unidade ida ba servisu DNTT munisípiu Vikeke.
MTK mos distribui ekipamentu seluk hodi fasilita prosesu produsaun karta kondusaun, hanesan mákina fotokópia ida, komputadór ida no livrete ida.
Tuir Diretór Servisu DNTT munisípiu Vikeke, Saul Henrique, durante tinan barak DNTT munisípiu Vikeke laiha mákina imprime hodi produz karta kondusaun ba motorizada no karreta. Nune’e, bainhira motorista sira halo renovasaun ba karta kondusaun, funsionáriu DNTT Vikeke tenke lori ba munisípiu Baucau hafoin imprime kliente sira nia karta kondusaun.
“Maibé, ohin DNTT nasionál distribui ona mákina imprime ba produsaun karta kondusaun orijinál nian. Entrega ona ba ami hodi uza ba atendementu kliente sira iha munisípiu Vikeke. Ha’u sente katak fasilidade sira ne’e bele ajuda ami hodi atende ita-nia komunidade iha munisípiu Vikeke ho di’ak,” nia esplika.
Saul dehan, hosi ohin ba oin, motorista sira bele trata no renova sira nia karta kondusaun diretamente iha DNTT Munisípiu Vikeke.
“Tanba ita iha ona ekipamentu, nune’e karta kondusaun la presiza tan lori ba Baucau. Uluk, kliente sira tenke bá Baucau hodi renova karta kondusaun, no sai dezafiu boot ba sira,” nia akresenta.
Saul relata katak, ho distribuisaun mákina ne’e, DNTT hahú ona prosesu renovasaun karta kondusaun ba kliente sira, inklui sira ne’ebé karta kondusaun mate ona.
“Daudauk ne’e, ita iha blanku hamutuk 500. Bainhira blanku sira ne’e hotu, ami sei halo pedidu ba nasionál hodi apoia ami,” nia akresenta.
Jornalista: Vitorino Lopes da Costa
Editór: Filomeno Martins
