DILI, 18 Abríl 2026 (TATOLI)-Asosiasaun Arte no Kultura Timor Furak, sábadu ne’e, hamutuk Surik Timor, JMMA “Jefri Maria Model Agency” no Timor Plaza realiza atividade Kids and Teens TAIS Fashion Show Contest 2026 ba labarik ki’ikoan sira hahú husi idade tinan-haat to’o tinan-16.
Koordenadór Asosiasaun Arte no Kultura Timor Furak, Olivio Euklides dos Santos, esplika karak atividade referida sira halo kada tinan dezde tinan-2022, 2023, 2024 no 2026 ne’e ba dala haat ona.
“Objetivu promove tais hametin identidade timoroan, kria espasu ba ki’ik oan foinsa’e sira hodi espresa sira-nia talentu liuliu iha indústria model nian, importante ba sira hetan konfiansa fiar an iha palku leten”, Olivio Euklides dos Santos, hateten iha Timor Plaza, Dili.
Nia esplika, kontestante ne’ebé partisipa iha eventu ne’e hamutuk 77 no fashion show ne’e ba kategória tolu tuir idade nian, kategória A idade tinan-haat no lima, sira la tuir kompetisaun maibé sira hatais tais sa’e de’it palku, kategória B idade neen to’o sia sira tuir kompetisaun no kategória C idade 10 to’o 16.
“Husi sira ne’e ida-ne’ebé mak sai manán-na’in dahuluk sei hetan osan $150, manán-na’in daruak $100 no datoluk $75, juara favoritu $50, osan sira ne’e la’ós apoiu husi Governu maibé mai husi kontestante sira ne’ebé rejistu ne’e, no sira mós hetan sasán balun husi patrosinadór”, nia dehan.
Sekretariu Estadu ba Arte no Kultura (SEAK), Jorge Soares Cristovão, hateten inisiativa husi Timor Furak ne’ebé mak organiza eventu fashion show ba ki’ik oan sira kompete importante Hw agora MK atu haree tamba foin tootebes tanba objetivu atu promove tais.
“Objetivu husi atividade ne’e atu promove ita-nia tais ne’ebé hanesan patrimóniu kulturál. No, fó oportunidade ba alin sira hatudu sira-nia talentu, aleinde ne’e sira mós bele espresa sira-nia vontade kadi mentál atu sai joven ne’ebé di’ak iha futuru”, nia hateten.
Ministru Komérsiu no Indústria, Filipus Nino Pereira hateten, eventu ne’e importante tebes tanba hahú husi ki’ik-oan sira hatais tais tau manu-fulun iha ulun, tau morten, kaebauk, belak ida-ne’e hahú promove kultura no identidade Timor husi ki’ik.
“Timor Furak ho nia patrosinadór ne’ebé realiza eventu ida-ne’e importante tebes tanba kontinua kuda, valoriza daudaun ita-nia tais no eransa ne’ebé mai duni husi ita-nia beiala sira, ita kuidadu husi jerasaun ba jerasaun”, Nino hateten.
Membru Governu ne’e dehan, agora iha era dijitál, teknolojia avansada, dalabarak halo ema haluhan tiha kultura no identidade ne’ebé ho eventu sira hanesan ne’e bele fó hanoin no halo promosaun ne’ebé di’ak ba alin ki’ik oan sira hodi koñese kultura no identidade Timor nian.
“Timor-Leste ita orgullu tanba ita-nia tais sai ona patrimóniu mundiál ne’ebé ita hothotu iha responsabilidade atu bele kuidadu nafatin ita-nia eransa kulturál identidade tais ne’ebé mak iha ninia prosesu halo husi tradisionál ne’ebé lori tempu”, nia subliña.
Tuir nia, Governu iha polítika atu prezersa, konserva no atu promove, valoriza produtu tais ne’e ho valór ne’ebé mak komersializa iha ninia valór ekonómiku.
“Tanbá ne’e mak ita kontente nafatin ho eventu sira ne’e ita bele hatene ona katak Timor-Leste agora ita iha ASEAN sei iha eventu barak ne’ebé sei kria, ita sei lori Timor-Leste ninia produtu ba iha eventu internasionál sira”, nia konklui.
Atividade ne’e realiza tanba hetan apoiu husi patrodinadór hanesan Country Choice, NWTL, Jack’s Timor-Leste, Aurora.
Jornalista: Arminda Fonseca
Editór: Rafael Ximenes de A. Belo
