BAUKAU, 19 Abríl 2026 (TATOLI) – Unidade Sosiedade Sívil no Asuntu Sosiál (SSAS) Prezidénsia Repúblika liuhusi Prezidenti Repúblika, José Ramos-Horta sábadu ne’e, lansa Uma Mahon ba povu hamutuk benefisiáriu na’in-rua iha munisípiu Baukau.
Benefisiáriu na’in-rua referidu kompostu Maria da Costa nu’udar faluk husi área Badunau, aldeia Luliheni, suku Bucoli, postu administrativu Baukau vila no Justino nu’udar defisiente husi suku Lie-Oli, suku Uma-Ana-Olu, postu administrativu Venilale.
Prezidente Repúblika, José Ramos-Horta esplika, objetivu husi apoia Uma Mahon ba Povu atu reforsa Solidariedade Sosiál, promove inkluzaun ba grupu vulnerável sira no observa direta komunidade sira-nia Kondisaun moris iha área rurál.
“Fulan-tolu tenke prontu, kuartu ida halo kioske se lae ajuda de’it hakiak animál,” Prezidente Repúblika hateten iha Badunau, Bucoli, Sábadu ne’e.
Ramos Horta relata, apoia ne’ebé parte husi sentidu ajuda malu iha-ne’ebé orsamentu hirak-ne’e husi povu no kompromete sei buka fundu hodi kontinua apoia ba povu iha Timor-Leste.
Prezidente Horta orienta benefisiáriu atu hela provizoriamente ho família hodi hein Uma Mahon ba Povu finaliza tanba observa direita situasaun benefisiáriu na’in-rua ne’ebé hela iha kondisaun la dignu.
“Lalika agradese ba apoia ne’ebé fó, buat ne’ebé hau ajuda haree liu ba moris no lalehan,” Ramos enkoraza.
Reprezentante familia Maria da Costa, Agostinho Belo ‘ Maululik’ agradese ba Prezidente Repúblika ne’ebé apoia ona Uma ba benefisiáriu iha-ne’ebé apoia referida hakmaan ona moris tanba durante ne’e hasoru difikuldade.
“Ami hotu hein bainhira ramata bin bele hela ona iha laran no ami kompromete sei la ba tan hela iha fatuk-ku’ak,” Maululik hateten.
Entretantu, Konstrusaun uma rua referida tuir planu sei remata ho durasaun fulan-tolu ho orsamentu hamutuk rihun $29,22 ho medida 8×7 m² kompostu kuartu tolu hanesan rua hodi toba no ida utiliza ba kioske inklui dapur no saneamentu.
Alende ne’e, Prezidente Repúblika sei fasilita kedas ekipa dapur, ekipa uma-laran, dapur, bee-mos no eletrisidade.
Jornalista: Natalino Belo
Editór: Rafael Ximenes de A. Belo
