BAUKAU, 20 Abríl 2026 (TATOLI)—Autoridade Munisipál Baukau (AMB) hamutuk ho entidade sivíl, militár no líder komunitáriu, Segunda ne’e, selebra loron fundasaun (moris) Baukau ba da-167 ho tema “O Nosso Orgulho, A nossa Casa”.
Prezidente Autoridade Munisipál (PAM) Baukau, Veneranda Eurico Lemos Martins, esplika selebrasaun loron fundasaun Baukau sai ona kultura iha-ne’ebé tinan-haat liubá inisia husi Kámara Komérsiu no Indústria Timor-Leste (CCI-TL) ho intensaun hakarak kontinua istória relasiona ne’ebé beiala sira husik hela to’o agora.
“Ita sei kontinua komemora atu hatudu ba joven kontinuadór Baukau-oan sira atu hanoin hikas beiala sira-ne’ebé iha limitasaun maibé konsege harii Baukau ne’ebé sólidu, unidu, pás no estabilidade,” Prezidente Autoridade Munisipál (PAM) Baukau hateten iha resintu Administrasaun Vila Nova, Segunda ne’e.
Eis deputada ne’e relata AMB hamutuk ho instituisaun relevante sira hanesan CCI-TL Baukau no Asosiasaun Feto Emprezariál Timor-Leste (AMETL-sigla portugeza) Baukau instala komisaun organizadora iha-ne’ebé kada tinan sempre iha inovasaun hodi selebra loron fundasaun Baukau.
Nia esplika tema “O Nosso Orgulho, A Nossa Casa” ho sentidu Baukau nu’udár uma hodi sai fatin mahon ne’ebé nakloke ba Baukau-oan sira atu hakbesik an ba atu espresa hanoin hotu nune’e metin ba beibeik iha jerasaun ba jerasaun.
“Baukau ita hotu nian. Ita presiza prezerva buat-ne’ebé di’ak hanesan beiala kuda tiha ona. Hakribi violénsia atu lori ita-nia rai bá-oin,” Veneranda Lemos akresenta.
Selebrasaun loron fundasaun Baukau tinan-ne’e realiza ho sekuénsia programa hanesan misa agradesimentu, semináriu reflesaun, konvoi husi Vila Antiga ba resintu Administrasaun Munisipál Vila Nova, doasaun raan no palku animasaun ne’ebé partisipa husi dirijente serbisu munisipál, administradór postu administrativu, xefe suku, Kamara Komérsiu Indústria Timor-Leste (CCI-TL), veteranu no komunidade.
Entretantu, Munisípiu Baukau harii iha loron-20 Abríl 1859 ne’ebé deside hamutuk entre ukun-na’in no reinu Baukau-oan iha tempu kolonializmu Portugés.
Jornalista: Natalino Belo
Editór: Xisto Freitas da Piedade
