BAUKAU, 20 Abríl 2026 (TATOLI)—Prezidente Konsellu Munisipál Kombatente Libertasaun Nasionál (CMCLN-sigla portugeza), Cornélio Gama ‘L7’ enkoraja juventude Baukau-oan atu kontinua estuda nu’udár parte preparasaun hodi dezenvolve Baukau iha futuru.
Nia esplika situasaun atuál la’ós ona uza arma atu halo funu kontra inimigu hanesan uluk gerilleiru sira luta hodi liberta rai, maibé preparasaun hanesan estudu mak sai fatór determinasaun ba luta hasai povu husi mukit no ki’ak.
“Ami uluk analfabetu, tanba ne’e ha’u husu estudante sira tenke estuda maka’as nune’e futuru sai deputadu no balun forsa armada karik sai komandante to’o Jenerál,” Cornélio Gama ‘L7’ hateten iha resintu Administrasaun Munisipál Baukau bainhira partisipa iha selebrasaun loron fundasaun Baukau, Vila Nova, Segunda ne’e.
L7 relata CMCLN Baukau bandu atu juventude liuliu estudante no grupu arté marsiál halo violénsia hodi hamosu instabilidade iha Baukau, tanba ne’e nia parte sei hamutuk ho parte seguransa Polísia Nasionál Timor-Leste (PNTL) sei atua bainhira juventude Baukau-oan lakohi kria pás no estabilidade.
Aleinde ne’e, CMCLN Baukau konsidera edukasun uma-laran importante nune’e hato’o mensajen ba inan-aman atu kontinua tau-atensaun no kontrola oan sira antes halo ligasaun ho komunidade nune’e evita mosu instabilidade iha Baukau.
“Ami FALINTIL lakohi joven sira estraga nasaun maibé tenke estuda atu dezenvolve Baukau no prinsipalmente ita-nia nasaun,” L7 informa.
Jornalista: Natalino Belo
Editór: Xisto Freitas da Piedade
