DILI, 20 Abríl 2026 (TATOLI)—Diretór Jerál Servisu Nasionál Ambulánsia Emerjénsia no Médikamentu, Institutu Públiku (SNAEM, I.P), Simplicio Amaral, informa iha trimestre dahuluk ne’e (Janeiru to’o Marsu) ne’e, SANEM ezekuta Orsamentu Jerál Estadu (OJE) atinje ona 21,76% ($1.608.337,20).
Orsamentu Jerál Estadu 2026 ne’ebé mak aloka ba Servisu Nasionál Ambulánsia Emerjénsia Medikamentu, Institutu Públiku (NSAEM, I.P) hamutuk $3.381.258,00 ne’ebé fahe ba kategoria saláriu vensimentu, bens servisu, kapital menór no transferénsia públika.
“Husi Janeiru to’o Marsu, ita ezekuta ona salariu vensimentu to’o ona 28,07%, bens servisu ita ezekuta ona 25.94%, agora transferensia publika ida-ne’e mak uza halo evakuasaun areo nian ne’ebé ita ezekuta ona 20,97%. Depois ba kapitál menór mak ita seidauk ezekuta tanba ita seidauk sosa ambulánsia no kompra medikamentu nian,” Simplicio Amarál hateten ba jornalista sira iha nia kna’ar fatin Kaikoli, ohin.
Nia esplika, orsamentu balansu ne’ebé mak SANEM seidauk gasta hamutuk 47,57% no atuál osan ne’ebé mak iha hamutuk $735.843,57.
Entertantu, tuir dadus portál transperénsia ne’ebé mak TATOLI asesu katak husi Janeiru to’o 20 Abril 2026 no husi orsamentu alokadu hamutuk $3.381.258,00 ne’e ninia ezekusaun atinje ona 27.3% hanesan kompromisiu sira $926.468,23, obrigasaun sira $79.697,50, atuál $844.128,07 no saldo $1.530.964,20.
Jornalista : Felicidade Ximenes
Editór : Cancio Ximenes
Empreza Timor Safari sei sosa karreta ambulánsia ba Timor-Leste
DILI,20 abril 2026 (TATOLI)—Diretór Jerál Servisu Nasionál Ambulánsia Emerjénsia no Médikamentu, Institutu Públiku (SNAEM, I.P), Simplicio Amaral, garante iha fulan-Jullu ne’e Empreza Safari sei sosá ambulánsia tolu (3) no karreta trend ida ba Timor-Leste hodi distribui ba munisípiu sira-ne’ebé mak sei menus karreta ambulánsia.
“Iha tinan 2026 ne’e, empreza manán-na’in mak Timor Safari. Ita espera katak sira lori tama karreta ambulánsia ne’e, tenke ho tempu ne’ebé mak ita determina ona, maibé ita mós prekupa ho sitausau global, funu ne’ebé mak mosu iha rai sira seluk. Ita espera katak funu iha médiu oriente ne’eba ne’e labele fó mós impaktu ba nasaun komersiál, husi rai ne’ebé ita-nia kompañia sosa sasán, atu nune’e mai fila-fali liu husi via marítima labele impaktu hatama karreta ambulánsia mai,” Simplicio Amaral hateten ba Jornalista sira iha nia kna’ar fatin,ohin.
Nia relata, tuir regra aprovizionamentu hafoin públika empreza manán-na’in mak kompra no sei hatama karreta.
“Tuir regras aprovisionamentu katak loron 90 nia laran, sira tenke hatama karta mai iha Timor-Leste no se sira hatama karreta ambulánsia la tuir tempu, entaun sira tenke halo justifikasaun bazeia ba regra aprovizionamentu ne’ebé mak eziste iha ita-nia rain,” nia esplika.
Nia haktuir, karreta ambulánsia ne’e totál tolu no Kareta trend ida, ne’ebé Servisu Nasionál Ambulánsia Emerjénsia no Médikamentu sosa tan karreta hamutuk haat no empreza sei sosa iha nasaun Tailándia.
“Tinan kotuk sira sosa iha Tailandia, tinan ida-ne’e mós sira sosá nafatin iha Tailandia. Espera katak karreta ne’e tama ho kualidade ne’ebé mak di’ak, tanba konkursu públiku ne’e ita hahú loke iha fulan-Marsu maibé nia rezultadu ne’e ita foin sai iha semana kotuk. Ne’ebé hahú semana ida ba oin, sira bele hahú ona prosesu asina kontratu atu nune’e servisu bele la’o nafatin. Tanba ne’e ha’u espera katak Jullu no Agostu hanesan karreta bele hatama ona atu nune’e ita0nia populasaun sira bele uza,” nia dehan.
Tanba ne’e. Servisu Nasionál Ambulánsia Emerjénsia no Medikamentu espera empreza bele hatama karreta tuir regra ne’ebé mak iha, atu nune’e bele halo distribuisaun ba munisípiu sira-ne’ebé mak sei menus karreta ambulánsia no totál orsamentu n hamutuk rihun $300.
Entertantu, kareta ambulánsia ne’ebé mak daudaun ne’e halo movimentu tula pasiente sira iha teritoriu nasionál hamutuk 40
Jornalista : Felicidade Ximenes
Editór : Cancio Ximenes
