DILI, 20 Abríl 2026 (TATOLI)—Primeiru-Ministru (PM), Kay Rala Xanana Gusmão, Sekretáriu Estadu Asuntu Toponímia Organizasaun Urbana (SEATOU) ho Ajénsia Dezenvolvimentu Nasionál (ADN) observa direta aeroportu hafoin udan horisehik, tanba sei iha fatin risku ba inundasaun.
“Vizita urjente mai iha aeroportu tanba horisehik udan boot bee ne’ebé mak tun husi rotunda estatua Prezidente Nicolau Lobato nian nakonu iha estrada tanba volume udan bee boot, bee nakonu valeta entaun fakar mai hotu estrada tama tiha bá liu aeroportu laran. Tanba ne’e mak urjente PM bolu SEATOU ho ekipa ADN, Ministériu Obra Públika (MOP) mai hotu para haree ohin,” Sekretáriu Estadu Asuntu Toponímia Organizasaun Urbana, Germano Brites dehan ba jornalista sira hafoin observa aeroportu, Komoro, Dili, Segunda ne’e.
Liuhusi observasaun husi ekipa ne’e atu buka meiu oinsá bainhira udan karik bee bele la’o tuir nia dalan no labale hamosu inundasaun.
“Ohin ne’e mai haree oinsá para buka dalan haree ezgotu sira-ne’ebé mak intupidu, nune’e hadi’a depoiz ba futuru ita haree udan sei mai tan nia volume boot ne’e la’o halo nusa. Presiza haree atu nune’e fururu labele iha inundasaun,” nia dehan.
“Iha intupidu ne’ebá ne’e hamoos hela duni, soké ita-nia komunidade maka laiha konxiénsia soe lixu,” Germano hatutan.
Jornalista: Osória Marques
Editór: Xisto Freitas da Piedade
