VIKEKE, 20 Abríl 2026 (TATOLI)—Prezidente Repúblika (PR), José Ramos-Horta apoia nesesidade bázika ba família vulneravel sira iha Postu Administrativu Vikeke Vila, Uatulari no Uatukarbau hodi reforsa ai-han ba uma laran.
Iha PR Horta hateten, inisiatia apoia umanitária ne’e hanesan buat ki’ik ida hodi apoia ba família sira hodi responde ba emerjénsia sira, maibé karik konsume ramata bele kontatu ba gabinete PR hodi apoia tan ba família sira.
Pakote umanitária ne’ebé PR apoia ba família vulneravel sira kompostu husi mina bimoli litru lima no foos ba populasaun suku ualu iha Postu Uatulari, populasaun suku neen iha Postu Uatukarbau no populasaun iha Vikeke Vila. Kada suku uma-kain 25 mak hetan apoiu referidu.
“Se ita iha posisiblidade atu apoia ba ita-nia maluk vulneravel sira, tulun de’it. La presiza haree ne’e konstituisionál ka lae. Tan ne’e mak ha’u iha fundamentu apoia ba ita-nia maluk sira,” nia hato’o iha Suku Makadike de Cima, Postu Uatulari, Segunda ne’e.
Iha fatin hanesan, Administradór Postu Uatulari, Jorge Ribeiro, hato’o agradese ba PR Horta ne’ebé bele disponibliza an to’o iha Postu Uatulari hodi apoia umanitária ba família vulneravel sira.
Iha fatin ketak, Administradór Postu Uatukarbau, Anacleto Doutel, haktuir komunidade Postu Uatukarbau sente orgullu tebes ba prezensa PR Horta iha Postu Uatukarbau tanba durante tinan naruk hein PR la mai vizita komunidade.
Entretantu, iha vizita PR Horta ho nia komitiva simu direta husi autoridade lokál, komunidade, veteranu, estudante no hetan seguransa másima husi husi autoridade seguransa polísia inklui F-FDTL durante PR nia vizita iha Munisípiu Vikeke.
Jornalista: Vitorino Lopes da Costa
Editór: Xisto Freitas da Piedade
