OEKUSI, 20 Abríl 2026 (TATOLI) – Prezidente Konsellu Administrasaun Fundu Infraestrutura (KAFI), Gastão Souza, atuál Ministru Planeiamentu Investimentu no Estratéjiku (MPIE), segunda ohin, realiza reuniaun daruak ho membru KAFI sira iha Rejiaun Administrativa Espesiál Oekusi Ambeno (RAEOA), no konsege aprova projetu emerjénsia 30-resin inklui monumentu Lifau no Jardin Oébau.
“Reuniaun KAFI ne’e, atu aprova autorizasaun despeza ba projetu saúde sira-nian, Ministériu Ensinu Superiór, MOP no projetu balun ne’ebé durante ne’e Primeiru-Ministru la’o ba podér lokál haree eskola no postu saúde presiza urjente tebes, ne’e mak ami aprova iha reuniaun ne’e,” nia hateten ba jornalista sira iha salaun Konvensaun Palaban Oekusi, ohin.
Governante ne’e, informa mós katak, iha reuniaun daruak ne’e, aprova mós rezultadu projetu sira-ne’ebé halo ona konkursu públiku, ne’e dehan katak, aprova tiha ona, nune’e entidade judikál sira bele asina kontratu no hala’o obra sira ba oin, “Mak ida ne’e de’it, ohin laiha desizaun ba projetu foun ruma,” nia afirma.
Nia esplika, projetu ne’ebé aprovadu iha reuniaun ne’e, mak hanesan Institutu Politéknika Betanu (IPB) atu hahú ona konstrusaun tenke asina ona kontratu ho Governu, estrada husi Oéleu ba Lolotoe iha munisípiu Bobonaru tempu-badak sei asina ona kontratu inklui sira seluk, balun ba postu saúde no projetu balu presiza re-dezeñu no mós irigasaun Karau-Ulun.
“Ne’ebé, ohin aprova projetu ba saúde nian 24 ne’e mós autorizasaun despeza, re-dezeñu tolu, ne’ebé ohin ami konsege aprova projetu 30-resin balu iha Oekusi hanesan Monumentu Lifau, Jardím Oébau ho tan morru protesaun ba ponte Noefefan, ne’ebé Lifau posibilidade tenke reabilita,” nia hateten.
Notísia relevante: Autoridade RAEOA atribui orden servisu ba empreza 154 implementa projetu KAFI
Ministru Transporte no Komunikasaun (MTK), Miguel Manetelo, nu’udar membru KAFI konsidera aprovasaun ba projetu 30-resin iha reuniaun daruak ne’e prienxe duni korum ba desizaun finál.
“Ha’u membru KAFI mai atu haree projetu lubun ida, ohin ko’alia ona ho Prezidente KAFI, tanba iha projetu barak husi saúde, edukasaun no obra públika, maibé tanba membru KAFI ha’u tenke mai, sela’e ohin la prienxe korum, tanba Ministra Finansa laiha ne’ebé membru na’in-haat, pelu-menus ohin ami na’in-tolu prienxe korum atu foti desizaun ruma ba desizaun KAFI nian,” nia hateten.
Notísia relevante:KAFI prioriza projetu reabilitasaun estrada iha Oekusi
Entretantu, membru KAFI ne’ebé partisipa iha reuniaun ne’e, mai husi Ministru Ensinu Superiór Siénsia no Kultura (MESSK), Ministra Saúde, Ministériu Obra Públika, Ajénsia Dezenvolvimentu Nasionál (ADN,I.P), Autoridade Nasionál Komunikasaun (ANC) no seluktan.
Jornalista: Abílio Elo Nini
Editór: Rafael Ximenes de A. Belo
