DILI, 20 Abríl 2026 (TATOLI)—Ró kruzeiru Odyssey ne’ebé orijen husi Bahamas tula turista estranjeiru na’in-294 no tripulante hamutuk na’in-200, daudaun ne’e atraka iha Dili hafoin halo viajen husi Kupang (NTT) hodi halo vizita kona-ba ospitalidade no sítiu turístiku iha kapitál Dili durante loron rua.
Ekipa Ajénsia Portu ANL, Emidio Esteves, hateten ró ne’e mai husi Kupang no to’o Dili tuku 07h00 dadeer, ho objetivu atu lori turista sira hala’o vizita Timor-Leste liuliu sítiu turístiku sira iha kapitál Dili hanesan Kristu Rei, Merkadu Tais Kolmera, semitériu Santa Krúz no seluk tan.
“Ohin, kuazé iha pasajeiru na’in 20-resin mak tun la’o halimar iha Dili laran, barak mak lae tanba pasajeiru sira-ne’e barak liu ferik no katuas, entaun sira halo vijita de’it iha área Dili laran la sai ba fatin seluk. Maibé, aban lorokraik sira fila-fali ona ba destinasaun Labuan Bajo Indonézia,” nia informa ba Agência Tatoli iha portu Dili, ohin.
Nia afirma, pasajeiru sira-ne’e halo viajen ho pasaporte no ohin molok sira atu atraka ekipa husi Diresaun Transporte Marítima ba halo ona inspesaun no rejisau atu foti dadus pasajeiru sira-nian, aleinde ró ne’e labele atraka iha portu Dili tanba kondisaun espasu la to’o.
“Ró ne’e labele para besik iha portu tanba espasu laiha, maibé ró ne’e rasik iha ninia ró emerjénsia ki’ik ne’ebé bele fasilita tula pasajeiru sira mai to’o rai-maran,” nia esplika.
Reprezentante turista husi San Diego Kalifórnia Amérika, Emily Ortiz, sente kontente tebes ho atendimentu ospitalidade (Hospitality), bainhira sira halo vizita ho ró turístiku Odyssey, durante loron ida iha Dili.
“Ospitalidade di’ak tebes, ami gosta haree ikan sira iha tasi laran ho kór azúl, inklui ninia korál sira,” nia dehan.
Nia hatutan, atendimentu husi taxista sira mós konfortavel tebes ho ninia presu ne’ebé ladun karun no timoroan mesak oin midar, tanba ne’e atrai tebes nia ho nia belun sira aban sei kontinua vizita tan ba fatin seluk iha Dili laran.
“Durante ami-nia vizita ohin, ami mós ba han iha restaurante balun hodi koko produtu lokál hanesan fehuk, aifarina no akar, entaun hahán sira-ne’e sabór tebes tanba ne’e ha’u hadomi Timor,” nia hateten.
Entretantu, ró kruzeiru refere iha kapasidade bele akumula pasajeiru to’o 1380, ne’ebé kompostu husi adultu 1300, labarik na’in-64 no infánsia hamutuk na’in-16.
Jornalista : Alexandra da Costa
Editór : Cancio Ximenes
