DILI, 20 Abríl 2026 (TATOLI)—Primeiru-Ministru, Kay Rala Xanana Gusmão, halo observasaun direta ba kondisaun drainajen iha rotunda Estátua Prezidente Nicolau Lobato, hafoin udan iha domingu (19/04) ne’e fó impaktu inundasaun ba iha areadór Aeroportu Inernasionál Prezidente Nicolau Lobato, Komoro.
Primeiru-Ministru, Kay Rala Xanana Gusmão, orienta kedas ba Sekretáriu Estadu Asuntu Toponímia Organizasaun Urbana (SEATOU) no Agência Dezenvolvimentu Nasionál (ADN), atu fó atensaun no koordena ho empreza hodi organiza ekipa hamoos lixu sira-ne’ebé intupidu iha drainajen laran tanba komunidade so’e lixu arbiru.
“Ohin, ita temi dehan atu hadi’a fali bee-dalan ne’e lakika, maibé normliza tiha bee-dalan atu bee labele suli ba fali ba aeroportu laran, maibé sulin sai fali ba li’ur. ADN koordena ho empreza ne’ebé retensaun ba halo manutensaun, tanba drainejen ne’e foer lahalimar,” Xefe Governu ne’e hateten ba jornalista sira rotunda Nicolau Lobato, Komoro, ohin.
Tanba ne’e, Xefe Governu ne’e mós apela ba komunidade atu kontrola no hamoos lixu ne’ebé so’e arbiru atu labele fó impaktu ba bee-dalan.
“Imi la’ós hamoos de’it maibé kontrola bee-dalan atu sulin ho di’ak. Imi lalika hein bee intupidu no bee tama ona ba uma mak foin fó hatene ba Governu,” nia dehan.
Iha biban ne’e, Koordenadór Agência Dezenvolvimentu Nasionál (ADN), Francisco Xavier de Deus Jerónimo, hateten ohin ne’e Primeiru-Ministru husu hela katak bee sira-ne’ebé sulin husi rotunda Nicolau Lobato ne’e sai ba ne’ebé, entaun nia dehan bee sira-ne’e sulin sai ba área karantina nian hodi kontinua sulin ba tasi.
“Maibé agora problema bee sa’e maka’as iha rotunda tama liu ba aeroportu ne’e tanba foer intupidu maka’as iha kanál ida atu soe bee ba iha área karantina nian ne’e. Drainajen ida iha uitoan ne’e bee atu sulin lalais araska tanba foer barak loos ne’e mak fó impaktu bee nalihun iha estrada sulin ba to’o aeroportu,” nia hateten.
Nia hatutan, drainejen ida seluk iha aeroportu laran ne’ebé simu bee atu kontinua sulin ba mota ho tasi ne’e laiha manutensaun rutina, nune’e foer no sedimentasaun no duut mak taka metin, entaun bee la sulin ho di’ak tuir kanalizasaun, maibé bee nakonu halo nalihun iha aeroportu laran no sulin fali ba run away (pista aeroportu) nian.
“Tanba ne’e, ami ekipa SEATOU, ANATL haree hamutuk, tanba drainajen internál ida iha aeroportu laran ne’e, nia sei ko’alia ho empreza Waskita Karya atu rezolve problema ne’e,” nia dehan.
Nia afirma, daudaun ne’e ADN no MOP orienta hela empreza Dili United, ne’ebé halo manutensaun rutina ne’e halo hela servisu iha terrenu hodi hamoos kada semana, maibé komunidade nia konsiénsia soe lixu arbiru ne’e mak fó kontribuisaun ba inundasaun iha estrada no aeroportu.
Empreza Dili United ne’e servisu tesi duut no tesi ai, enkuantu kona-ba hamoos drainajen nian seidauk iha, tamba ne’ sira sei koordena ho parte kompetente sira atu haree kona-ba asuntu ida-ne’e.
Maibé, nia dehan, ADN sei koordena ho MOP atu haree dalan alternativa hodi diminui situasaun ida agora duadaun akontese ne’e.
Notísia Relevante:
Jornalista : Alexandra da Costa
Editór : Cancio Ximenes
