BOBONARU, 21 Abríl 2026 (TATOLI)-Komandante sesante Polisía Nasionál Timor-Leste (PNTL), munisípiu Bobonaru, Komisáriu Asistente Agustinho Gomes da Silva, entrega rota komandu ba superiór foun, Superintendente Xefe Damião da Silva Correia, hodi lidera PNTL munisípiu Bobonaru.
Responsabilidade servisu ne’e komandante na’in-rua simu no entrega ba malu liuhusi serimónia parada simples hafoin simu pose husi Komandante Jerál PNTL, Komisáriu Afonso dos Santos, iha kuartél komandu PNTL, Kaikoli, Dili, horisehik, loron 20 Abríl.
Iha intervensaun, Komandante sesante no atuál Komandante Unidade Espesíal Polísia (UEP), Komisáriu Asistente Agustinho Gomes da Silva afirma katak serimónia parada ne’e atu hametin tradisaun militár, polisiál, nune’e patriota PNTL sira kontinua dedika-an ba Estadu no povu ho firmeza, profeisionál no responsabilidade.
Molok husik Bobonaru, Komandante ho diviza fitun ida-ne’e husu ba komponente hotu-hotu atu serbisu hamutuk ho komandante foun hodi garante seguransa no orden públika.
Nia husu mós ba komandante foun atu mantein relasaun di’ak ho autoridade munisípiu Bobonaru, igreja, Konsellu Munisipál Kombatente Libertasaun Nasionál no líder komunitáriu sira iha suku.
Agustinho Gomes agradese ba membru sira ne’ebé hatudu ona sira-nia obidiénsia, lealdade, dedikasaun no sakrifísiu durante nia lideransa tinan rua fulan haat hodi garante seguransa no ordem públika ba povu iha munisípiu Bobonaru.
Xefe Suku Odomau, Cirílio Sírio Bere, fiar katak ho lideransa komandante foun sei kontinua orienta membru sira halo servisu ho profisionál no responsablidade iha kualkér atuasaun.
Nia observ kataka durante ne’e Komandu Munisípiu Polísia Bobonaru hatudu ninia profisionalidade, kompromisu hodi tulun komunidade atu moris ho hakmatek iha kualkér atividade.
“Ba oin saida mak importante, presiza serbisu hamutuk ho entidade hotu, inklui autoridade, nune’e bele garante situasaun hakmatek iha munisípiu Bobonaru, espesialmente iha Maliana. Husu komadante foun atu banati tuir lala’ok ne’ebé komandante sesante hala’o, nafatin koordena liga ho problema komunidade nia”, nia dehan.
Serimónia entrega servisu ne’e partisipa mós husi Prezidente Autoridade Munisípiu Bobonaru, Paulo Moniz Maia, Prezidente Konsellu Munisipál Kombatente Libertasaun Nasionál, António Lema Bere ‘Leobalu’, Komandante F-FDTL Tunubibi, parte Igreja, diretór servisu munisipál, delegasaun territoriál no seluk tan.
Notísia relevante: Komandante Jerál Afonso dos Santos fó pose ba ofisiál superiór PNTL na’in -13
Jornalista: Sergio da Cruz
Editora: Maria Auxiliadora
